၄၃၄. စက္ကဝါကဇာတကံ (၈)

၆၉. ကာသာယဝတ္ထေ သကုဏေ ဝဒါမိ၊ ဒုဝေ ဒုဝေ နန္ဒမနေ [နန္ဒိမနေ (သီ. ပီ.)] စရန္တေ၊

ကံ အဏ္ဍဇံ အဏ္ဍဇာ မာနုသေသု၊ ဇာတိံ ပသံသန္တိ တဒိင်္ဃ ဗြူထ.

၇၀. အမှေ မနုဿေသု မနုဿဟိံသ၊ အနုဗ္ဗတေ [အနုပုဗ္ဗကေ (က.)] စက္ကဝါကေ ဝဒန္တိ၊

ကလျာဏဘာဝမှေ [ဘာဝ’မှ (သီ. ပီ.)] ဒိဇေသု သမ္မတာ၊ အဘိရူပါ [အဘီတရူပါ (သီ. သျာ. ပီ.)] ဝိစရာမ အဏ္ဏဝေ. ( ) [(န ဃာသဟေတူပိ ကရောမ ပါပံ) (က.)]

၇၁. ကိံ အဏ္ဏဝေ ကာနိ ဖလာနိ ဘုဉ္ဇေ၊ မံသံ ကုတော ခါဒထ စက္ကဝါကာ၊

ကိံ ဘောဇနံ ဘုဉ္ဇထ ဝေါ အနောမာ [အဘိဏှံ (က.)]၊ ဗလဉ္စ ဝဏ္ဏော စ အနပ္ပရူပါ [အနပ္ပရူပေါ (သီ. သျာ. ပီ.)].

၇၂. န အဏ္ဏဝေ သန္တိ ဖလာနိ ဓင်္က၊ မံသံ ကုတော ခါဒိတုံ စက္ကဝါကေ၊

သေဝါလဘက္ခမှ [ဘက္ခိမှ (က.)] အပါဏဘောဇနာ [အဝါကဘောဇနာ (သီ. ပီ.)]၊ န ဃာသဟေတူပိ ကရောမ ပါပံ.

၇၃. န မေ ဣဒံ ရုစ္စတိ စက္ကဝါက၊ အသ္မိံ ဘဝေ ဘောဇနသန္နိကာသော၊

အဟောသိ ပုဗ္ဗေ တတော မေ အညထာ၊ ဣစ္စေဝ မေ ဝိမတိ ဧတ္ထ ဇာတာ.

၇၄. အဟမ္ပိ မံသာနိ ဖလာနိ ဘုဉ္ဇေ၊ အန္နာနိ စ လောဏိယတေလိယာနိ၊

ရသံ မနုဿေသု လဘာမိ ဘောတ္တုံ၊ သူရောဝ သင်္ဂါမမုခံ ဝိဇေတွာ၊

န စ မေ တာဒိသော ဝဏ္ဏော၊ စက္ကဝါက ယထာ တဝ.

၇၅. အသုဒ္ဓဘက္ခောသိ ခဏာနုပါတီ၊ ကိစ္ဆေန တေ လဗ္ဘတိ အန္နပါနံ၊

န တုဿသီ ရုက္ခဖလေဟိ ဓင်္က၊ မံသာနိ ဝါ ယာနိ သုသာနမဇ္ဈေ.

၇၆. ယော သာဟသေန အဓိဂမ္မ ဘောဂေ၊ ပရိဘုဉ္ဇတိ ဓင်္က ခဏာနုပါတီ၊

တတော ဥပက္ကောသတိ နံ သဘာဝေါ၊ ဥပက္ကုဋ္ဌော ဝဏ္ဏဗလံ ဇဟာတိ.

၇၇. အပ္ပမ္ပိ စေ နိဗ္ဗုတိံ ဘုဉ္ဇတီ ယဒိ၊ အသာဟသေန အပရူပဃာတီ [အသာဟသေနာနုပဃာတိနော (က.)]၊

ဗလဉ္စ ဝဏ္ဏော စ တဒဿ ဟောတိ၊ န ဟိ သဗ္ဗော အာဟာရမယေန ဝဏ္ဏောတိ.

စက္ကဝါကဇာတကံ အဋ္ဌမံ.