၄၂၆. ဒီပိဇာတကံ (၁၀)

၈၈. ခမနီယံ ယာပနီယံ၊ ကစ္စိ မာတုလ တေ သုခံ၊

သုခံ တေ အမ္မာ အဝစ၊ သုခကာမာဝ [သုခကာမာ ဟိ (သီ. သျာ. ပီ.)] တေ မယံ.

၈၉. နင်္ဂုဋ္ဌံ မေ အဝက္ကမ္မ [အပက္ကမ္မ (က.)]၊ ဟေဌယိတွာန [ပေါထယိတွာန (က.)] ဧဠိကေ [ဧဠကိ (သျာ.)၊ ဧဠိကိ (ပီ.)]၊

သာဇ္ဇ မာတုလဝါဒေန၊ မုဉ္စိတဗ္ဗာ နု မညသိ.

၉၀. ပုရတ္ထာမုခေါ နိသိန္နောသိ၊ အဟံ တေ မုခမာဂတာ၊

ပစ္ဆတော တုယှံ နင်္ဂုဋ္ဌံ၊ ကထံ ခွာဟံ အဝက္ကမိံ [အပက္ကမိံ (က.)].

၉၁. ယာဝတာ စတုရော ဒီပါ၊ သသမုဒ္ဒါ သပဗ္ဗတာ၊

တာဝတာ မယှံ နင်္ဂုဋ္ဌံ၊ ကထံ ခေါ တွံ ဝိဝဇ္ဇယိ.

၉၂. ပုဗ္ဗေဝ မေတမက္ခိံသု [မေတံ အက္ခံသု (သီ. ပီ.)]၊ မာတာ ပိတာ စ ဘာတရော၊

ဒီဃံ ဒုဋ္ဌဿ နင်္ဂုဋ္ဌံ၊ သာမှိ ဝေဟာယသာဂတာ.

၉၃. တဉ္စ ဒိသွာန အာယန္တိံ၊ အန္တလိက္ခသ္မိ ဧဠိကေ၊

မိဂသံဃော ပလာယိတ္ထ၊ ဘက္ခော မေ နာသိတော တယာ.

၉၄. ဣစ္စေဝံ ဝိလပန္တိယာ၊ ဧဠကိယာ ရုဟဂ္ဃသော၊

ဂလကံ အနွာဝမဒ္ဒိ၊ နတ္ထိ ဒုဋ္ဌေ သုဘာသိတံ.

၉၅. နေဝ ဒုဋ္ဌေ နယော အတ္ထိ၊ န ဓမ္မော န သုဘာသိတံ၊

နိက္ကမံ ဒုဋ္ဌေ ယုဉ္ဇေထ၊ သော စ သဗ္ဘိံ န ရဉ္ဇတီတိ.

ဒီပိဇာတကံ ဒသမံ.

အဋ္ဌကနိပါတံ နိဋ္ဌိတံ.