၄၁၃. ဓူမကာရိဇာတကံ (၇-၂-၈)

၁၂၈. ရာဇာ အပုစ္ဆိ ဝိဓုရံ၊ ဓမ္မကာမော ယုဓိဋ္ဌိလော၊

အပိ ဗြာဟ္မဏ ဇာနာသိ၊ ကော ဧကော ဗဟု သောစတိ.

၁၂၉. ဗြာဟ္မဏော အဇယူထေန၊ ပဟူတေဓော [ဗဟူတေဇော (ပီ. က.)၊ ဗဟုတေန္ဒော (သျာ.)] ဝနေ ဝသံ၊

ဓူမံ အကာသိ ဝါသေဋ္ဌော၊ ရတ္တိန္ဒိဝမတန္ဒိတော.

၁၃၀. တဿ တံ ဓူမဂန္ဓေန၊ သရဘာ မကသဍ္ဍိတာ [မကသဒ္ဒိတာ (သီ. သျာ.)၊ မကသဋ္ဋိတာ (ပီ. က.)]၊

ဝဿာဝါသံ ဥပါဂစ္ဆုံ၊ ဓူမကာရိဿ သန္တိကေ.

၁၃၁. သရဘေသု မနံ ကတွာ၊ အဇာ သော နာဝဗုဇ္ဈထ၊

အာဂစ္ဆန္တီ ဝဇန္တီ ဝါ [အာဂစ္ဆန္တိ ဝဇန္တိ ဝါ (သျာ. ပီ.)၊ အာဂစ္ဆန္တိံ ဝဇန္တိံ ဝါ (က.)]၊ တဿ တာ ဝိနသုံ [ဝိနဿုံ (သီ.)] အဇာ.

၁၃၂. သရဘာ သရဒေ ကာလေ၊ ပဟီနမကသေ ဝနေ၊

ပါဝိသုံ ဂိရိဒုဂ္ဂါနိ၊ နဒီနံ ပဘဝါနိ စ.

၁၃၃. သရဘေ စ ဂတေ ဒိသွာ၊ အဇာ စ ဝိဘဝံ ဂတာ [အဇေ စ ဝိဘဝံ ဂတေ (က.)]၊

ကိသော စ ဝိဝဏ္ဏော စာသိ၊ ပဏ္ဍုရောဂီ စ ဗြာဟ္မဏော.

၁၃၄. ဧဝံ ယော သံ နိရံကတွာ၊ အာဂန္တုံ ကုရုတေ ပိယံ၊

သော ဧကော ဗဟု သောစတိ၊ ဓူမကာရီဝ ဗြာဟ္မဏောတိ.

ဓူမကာရိဇာတကံ အဋ္ဌမံ.