၄၀၉. ဒဠှဓမ္မဇာတကံ (၇-၂-၄)

၉၈. အဟံ စေ ဒဠှဓမ္မဿ [ဒဠှဓမ္မာယ (ပီ.)]၊ ဝဟန္တိ နာဘိရာဓယိံ၊

ဓရန္တီ ဥရသိ သလ္လံ၊ ယုဒ္ဓေ ဝိက္ကန္တစာရိနီ.

၉၉. နူန ရာဇာ န ဇာနာတိ [န ဟ နူန ရာဇာ ဇာနာတိ (သီ. ပီ.)]၊ မမ ဝိက္ကမပေါရိသံ၊

သင်္ဂါမေ သုကတန္တာနိ၊ ဒူတဝိပ္ပဟိတာနိ စ.

၁၀၀. သာ နူနာဟံ မရိဿာမိ၊ အဗန္ဓု အပရာယိနီ [အပရာယိဏီ (သီ.)၊ အပရာယဏီ (?)]၊

တဒါ ဟိ [တထာ ဟိ (ပီ.)] ကုမ္ဘကာရဿ၊ ဒိန္နာ ဆကဏဟာရိကာ.

၁၀၁. ယာဝတာသီသတီ ပေါသော၊ တာဝဒေဝ ပဝီဏတိ၊

အတ္ထာပါယေ ဇဟန္တိ နံ၊ ဩဋ္ဌိဗျာဓိံဝ ခတ္တိယော.

၁၀၂. ယော ပုဗ္ဗေ ကတကလျာဏော၊ ကတတ္ထော နာဝဗုဇ္ဈတိ၊

အတ္ထာ တဿ ပလုဇ္ဇန္တိ၊ ယေ ဟောန္တိ အဘိပတ္ထိတာ.

၁၀၃. ယော ပုဗ္ဗေ ကတကလျာဏော၊ ကတတ္ထော မနုဗုဇ္ဈတိ၊

အတ္ထာ တဿ ပဝဍ္ဎန္တိ၊ ယေ ဟောန္တိ အဘိပတ္ထိတာ.

၁၀၄. တံ ဝေါ ဝဒါမိ ဘဒ္ဒန္တေ [ဘဒ္ဒံ ဝေါ (သီ. သျာ. ပီ.)]၊ ယာဝန္တေတ္ထ သမာဂတာ၊

သဗ္ဗေ ကတညုနော ဟောထ၊ စိရံ သဂ္ဂမှိ ဌဿထာတိ.

ဒဠှဓမ္မဇာတကံ စတုတ္ထံ.