၃၉၉. မာတုပေါသကဂိဇ္ဈဇာတကံ (၇-၁-၄)

၂၂. တေ ကထံ နု ကရိဿန္တိ၊ ဝုဒ္ဓါ ဂိရိဒရီသယာ၊

အဟံ ဗဒ္ဓေါသ္မိ ပါသေန၊ နိလီယဿ ဝသံ ဂတော.

၂၃. ကိံ ဂိဇ္ဈ ပရိဒေဝသိ၊ ကာ နု တေ ပရိဒေဝနာ၊

န မေ သုတော ဝါ ဒိဋ္ဌော ဝါ၊ ဘာသန္တော မာနုသိံ ဒိဇော.

၂၄. ဘရာမိ မာတာပိတရော၊ ဝုဒ္ဓေ ဂိရိဒရီသယေ၊

တေ ကထံ နု ကရိဿန္တိ၊ အဟံ ဝသံ ဂတော တဝ.

၂၅. ယံ နု ဂိဇ္ဈော ယောဇနသတံ၊ ကုဏပါနိ အဝေက္ခတိ၊

ကသ္မာ ဇာလဉ္စ ပါသဉ္စ၊ အာသဇ္ဇာပိ န ဗုဇ္ဈသိ.

၂၆. ယဒါ ပရာဘဝေါ ဟောတိ၊ ပေါသော ဇီဝိတသင်္ခယေ၊

အထ ဇာလဉ္စ ပါသဉ္စ၊ အာသဇ္ဇာပိ န ဗုဇ္ဈတိ.

၂၇. ဘရဿု မာတာပိတရော၊ ဝုဒ္ဓေ ဂိရိဒရီသယေ၊

မယာ တွံ သမနုညာတော၊ သောတ္ထိံ ပဿာဟိ ဉာတကေ.

၂၈. ဧဝံ လုဒ္ဒက နန္ဒဿု၊ သဟ သဗ္ဗေဟိ ဉာတိဘိ၊

ဘရိဿံ မာတာပိတရော၊ ဝုဒ္ဓေ ဂိရိဒရီသယေတိ.

မာတုပေါသကဂိဇ္ဈဇာတကံ စတုတ္ထံ.