၃၉၅. ပါရာဝတဇာတကံ (၆-၂-၁၀)

၁၃၄. စိရဿံ ဝတ ပဿာမိ၊ သဟာယံ မဏိဓာရိနံ၊

သုကတာ [သုကတာယ (သီ. ပီ.)] မဿုကုတ္တိယာ၊ သောဘတေ ဝတ မေ သခါ.

၁၃၅. ပရူဠှကစ္ဆနခလောမော၊ အဟံ ကမ္မေသု ဗျာဝဋော၊

စိရဿံ နှာပိတံ လဒ္ဓါ၊ လောမံ တံ အဇ္ဇံ ဟာရယိံ [အပဟာရယိံ (သီ. ပီ.)].

၁၃၆. ယံ နု လောမံ အဟာရေသိ၊ ဒုလ္လဘံ လဒ္ဓ ကပ္ပကံ၊

အထ ကိဉ္စရဟိ တေ သမ္မ၊ ကဏ္ဌေ ကိဏိကိဏာယတိ [ဣဒံ ကဏ္ဌေ ကိဏာယတိ (က.)၊ ကဏ္ဌေ ကိံနိကိလာယတိ (သျာ.)].

၁၃၇. မနုဿသုခုမာလာနံ၊ မဏိ ကဏ္ဌေသု လမ္ဗတိ၊

တေသာဟံ အနုသိက္ခာမိ၊ မာ တွံ မညိ ဒဝါ ကတံ.

၁၃၈. သစေပိမံ ပိဟယသိ၊ မဿုကုတ္တိံ သုကာရိတံ၊

ကာရယိဿာမိ တေ သမ္မ၊ မဏိဉ္စာပိ ဒဒါမိ တေ.

၁၃၉. တွညေဝ မဏိနာ ဆန္နော၊ သုကတာယ စ မဿုယာ၊

အာမန္တ ခေါ တံ ဂစ္ဆာမိ၊ ပိယံ မေ တဝ ဒဿနန္တိ.

ပါရာဝတဇာတကံ [ကာကဇာတကံ (သီ. ပီ.)၊ မဏိဇာတကံ (သျာ.)] ဒသမံ.

ခရပုတ္တဝဂ္ဂေါ [သေနကဝဂ္ဂေါ (သီ. ပီ.)၊ ခုရပုတ္တဝဂ္ဂေါ (သျာ.)၊ သူစိဝဂ္ဂေါ (က.)] ဒုတိယော.

တဿုဒ္ဒါနံ –

အထ ပဿ သသူစိ စ တုဏ္ဍိလကော၊ မိဂ မယှကပဉ္စမပက္ခိဝရော၊

အထ ပဉ္ဇလိ ဝါရိဇ မေဇ္ဈ ပုန၊ အထ ဝဋ္ဋ ကပေါတဝရေန ဒသာတိ.

အထ ဝဂ္ဂုဒ္ဒါနံ –

အထ ဝဂ္ဂံ ပကိတ္တိဿံ၊ ဆနိပါတံ ဝရုတ္တမေ၊

အဝါရိယာ စ ခရော စ [သေနက (သီ.)၊ သူစိ စ (သျာ. က.)]၊ ဒွေ စ ဝုတ္တာ သုဗျဉ္ဇနာတိ.

ဆက္ကနိပါတံ နိဋ္ဌိတံ.