၃၉၃. ဝိဃာသာဒဇာတကံ (၆-၂-၈)

၁၂၂. သုသုခံ ဝတ ဇီဝန္တိ၊ ယေ ဇနာ ဝိဃာသာဒိနော၊

ဒိဋ္ဌေဝ ဓမ္မေ ပါသံသာ၊ သမ္ပရာယေ စ သုဂ္ဂတီ.

၁၂၃. သုကဿ [သုဝဿ (သီ. သျာ. ပီ.)] ဘာသမာနဿ၊ န နိသာမေထ ပဏ္ဍိတာ၊

ဣဒံ သုဏာထ သောဒရိယာ၊ အမှေဝါယံ ပသံသတိ.

၁၂၄. နာဟံ တုမှေ ပသံသာမိ၊ ကုဏပါဒါ သုဏာထ မေ၊

ဥစ္ဆိဋ္ဌဘောဇိနော [ဘောဇနာ (က.)] တုမှေ၊ န တုမှေ ဝိဃာသာဒိနော.

၁၂၅. သတ္တဝဿာ ပဗ္ဗဇိတာ၊ မေဇ္ဈာရညေ [မဇ္ဈေရညေ (က.)] သိခဏ္ဍိနော၊

ဝိဃာသေနေဝ ယာပေန္တာ၊ မယံ စေ ဘောတော ဂါရယှာ၊

ကေ နု ဘောတော ပသံသိယာ.

၁၂၆. တုမှေ သီဟာနံ ဗျဂ္ဃါနံ၊ ဝါဠာနဉ္စာဝသိဋ္ဌကံ၊

ဥစ္ဆိဋ္ဌေနေဝ ယာပေန္တာ၊ မညိဝှေါ ဝိဃာသာဒိနော.

၁၂၇. ယေ ဗြာဟ္မဏဿ သမဏဿ၊ အညဿ ဝါ [အညဿ စ (သီ. သျာ.)၊ အညဿေဝ (ပီ.)] ဝနိဗ္ဗိနော [ဝဏိဗ္ဗိနော (သီ. သျာ.)]၊

ဒတွာဝ [ဒတွာန (ပီ. က.)] သေသံ ဘုဉ္ဇန္တိ၊ တေ ဇနာ ဝိဃာသာဒိနောတိ.

ဝိဃာသာဒဇာတကံ အဋ္ဌမံ.