၃၉၀. မယှကဇာတကံ (၆-၂-၅)

၁၀၂. သကုဏော မယှကော နာမ၊ ဂိရိသာနုဒရီစရော၊

ပက္ကံ ပိပ္ဖလိမာရုယှ၊ မယှံ မယှန္တိ ကန္ဒတိ.

၁၀၃. တဿေဝံ ဝိလပန္တဿ၊ ဒိဇသံဃာ သမာဂတာ၊

ဘုတွာန ပိပ္ဖလိံ ယန္တိ၊ ဝိလပတွေဝ သော ဒိဇော.

၁၀၄. ဧဝမေဝ ဣဓေကစ္စော၊ သင်္ဃရိတွာ ဗဟုံ ဓနံ၊

နေဝတ္တနော န ဉာတီနံ၊ ယထောဓိံ ပဋိပဇ္ဇတိ.

၁၀၅. န သော အစ္ဆာဒနံ ဘတ္တံ၊ န မာလံ န ဝိလေပနံ၊

အနုဘောတိ [နာနုဘောတိ (သျာ. က.)] သကိံ ကိဉ္စိ၊ န သင်္ဂဏှာတိ ဉာတကေ.

၁၀၆. တဿေဝံ ဝိလပန္တဿ၊ မယှံ မယှန္တိ ရက္ခတော၊

ရာဇာနော အထ ဝါ စောရာ၊ ဒါယဒါ ယေ ဝ [ယေ စ (သျာ. က.)] အပ္ပိယာ၊

ဓနမာဒါယ ဂစ္ဆန္တိ၊ ဝိလပတွေဝ သော နရော.

၁၀၇. ဓီရော [ဓီရော စ (သီ.)] ဘောဂေ အဓိဂမ္မ၊ သင်္ဂဏှာတိ စ ဉာတကေ၊

တေန သော ကိတ္တိံ ပပ္ပေါတိ၊ ပေစ္စ သဂ္ဂေ ပမောဒတီတိ [သဂ္ဂေ စ မောဒတီတိ (သီ. ပီ.)].

မယှကဇာတကံ ပဉ္စမံ.