၃၈၇. သူစိဇာတကံ (၆-၂-၂)

၈၂. အကက္ကသံ အဖရုသံ၊ ခရဓောတံ သုပါသိယံ၊

သုခုမံ တိခိဏဂ္ဂဉ္စ၊ ကော သူစိံ ကေတုမိစ္ဆတိ.

၈၃. သုမဇ္ဇဉ္စ သုပါသဉ္စ၊ အနုပုဗ္ဗံ [အနုပုဗ္ဗ (သီ. သျာ.)] သုဝဋ္ဋိတံ၊

ဃနဃာတိမံ ပဋိထဒ္ဓံ၊ ကော သူစိံ ကေတုမိစ္ဆတိ.

၈၄. ဣတော ဒါနိ ပတာယန္တိ၊ သူစိယော ဗဠိသာနိ စ၊

ကောယံ ကမ္မာရဂါမသ္မိံ၊ သူစိံ ဝိက္ကေတုမိစ္ဆတိ.

၈၅. ဣတော သတ္ထာနိ ဂစ္ဆန္တိ၊ ကမ္မန္တာ ဝိဝိဓာ ပုထူ၊

ကောယံ ကမ္မာရဂါမသ္မိံ၊ သူစိံ ဝိက္ကေတုမိစ္ဆတိ [မရဟတိ (သီ. သျာ. ပီ.)].

၈၆. သူစိံ ကမ္မာရဂါမသ္မိံ၊ ဝိက္ကေတဗ္ဗာ ပဇာနတာ၊

အာစရိယာဝ ဇာနန္တိ [အာစရိယာ သဉ္ဇာနန္တိ (က.)၊ အာစရိယာ ပဇာနန္တိ (သျာ.)၊ အာစရိယာဝ သဉ္ဇာနန္တိ (ပီ.)]၊ ကမ္မံ သုကတဒုက္ကဋံ [ဒုက္ကတံ (သီ. ပီ.)].

၈၇. ဣမံ စေ [ဣမဉ္စ (သီ. သျာ. ပီ.)] တေ ပိတာ ဘဒ္ဒေ၊ သူစိံ ဇညာ မယာ ကတံ၊

တယာ စ မံ နိမန္တေယျ၊ ယဉ္စတ္ထညံ ဃရေ ဓနန္တိ.

သူစိဇာတကံ ဒုတိယံ.