၃၈၃. ကုက္ကုဋဇာတကံ (၆-၁-၈)

၅၇. သုစိတ္တပတ္တဆဒန၊ တမ္ဗစူဠ ဝိဟင်္ဂမ၊

ဩရောဟ ဒုမသာခါယ၊ မုဓာ ဘရိယာ ဘဝါမိ တေ.

၅၈. စတုပ္ပဒီ တွံ ကလျာဏိ၊ ဒွိပဒါဟံ မနောရမေ၊

မိဂီ ပက္ခီ အသညုတ္တာ၊ အညံ ပရိယေသ သာမိကံ.

၅၉. ကောမာရိကာ တေ ဟေဿာမိ၊ မဉ္ဇုကာ ပိယဘာဏိနီ၊

ဝိန္ဒ မံ အရိယေန ဝေဒေန၊ သာဝယ မံ ယဒိစ္ဆသိ.

၆၀. ကုဏပါဒိနိ လောဟိတပေ၊ စောရိ ကုက္ကုဋပေါထိနိ၊

န တွံ အရိယေန ဝေဒေန၊ မမံ ဘတ္တာရမိစ္ဆသိ.

၆၁. ဧဝမ္ပိ စတုရာ [စာတုရာ (သျာ. က.)] နာရီ၊ ဒိသွာန သဓနံ [ပဝရံ (သီ. သျာ. ပီ.)] နရံ၊

နေန္တိ သဏှာဟိ ဝါစာဟိ၊ ဗိဠာရီ ဝိယ ကုက္ကုဋံ.

၆၂. ယော စ ဥပ္ပတိတံ အတ္ထံ၊ န ခိပ္ပမနုဗုဇ္ဈတိ၊

အမိတ္တဝသမနွေတိ၊ ပစ္ဆာ စ အနုတပ္ပတိ.

၆၃. ယော စ ဥပ္ပတိတံ အတ္ထံ၊ ခိပ္ပမေဝ နိဗောဓတိ၊

မုစ္စတေ သတ္တုသမ္ဗာဓာ၊ ကုက္ကုဋောဝ ဗိဠာရိယာတိ.

ကုက္ကုဋဇာတကံ အဋ္ဌမံ.