၃၈၁. မိဂါလောပဇာတကံ (၆-၁-၆)

၃၄. န မေ ရုစ္စိ မိဂါလောပ၊ ယဿ တေ တာဒိသီ ဂတီ၊

အတုစ္စံ တာတ ပတသိ၊ အဘူမိံ တာတ သေဝသိ.

၃၅. စတုက္ကဏ္ဏံဝ ကေဒါရံ၊ ယဒါ တေ ပထဝီ သိယာ၊

တတော တာတ နိဝတ္တဿု၊ မာဿု ဧတ္တော ပရံ ဂမိ.

၃၆. သန္တိ အညေပိ သကုဏာ၊ ပတ္တယာနာ ဝိဟင်္ဂမာ၊

အက္ခိတ္တာ ဝါတဝေဂေန၊ နဋ္ဌာ တေ သဿတီသမာ.

၃၇. အကတွာ အပနန္ဒဿ [အပရဏ္ဏဿ (သီ. သျာ. ပီ.)]၊ ပိတု ဝုဒ္ဓဿ သာသနံ၊

ကာလဝါတေ အတိက္ကမ္မ၊ ဝေရမ္ဘာနံ ဝသံ အဂါ [ဂတော (သီ.)].

၃၈. တဿ ပုတ္တာ စ ဒါရာ စ၊ ယေ စညေ အနုဇီဝိနော၊

သဗ္ဗေ ဗျသနမာပါဒုံ၊ အနောဝါဒကရေ ဒိဇေ.

၃၉. ဧဝမ္ပိ ဣဓ ဝုဒ္ဓါနံ၊ ယော ဝါကျံ နာဝဗုဇ္ဈတိ၊

အတိသီမစရော [အတိသီမံ စရော (သီ. သျာ. က.)] ဒိတ္တော၊ ဂိဇ္ဈောဝါတီတသာသနော၊

သဗ္ဗေ ဗျသနံ ပပ္ပေါန္တိ၊ အကတွာ ဗုဒ္ဓသာသနန္တိ.

မိဂါလောပဇာတကံ ဆဋ္ဌံ.