၃၇၉. နေရုဇာတကံ (၆-၁-၄)

၂၀. ကာကောလာ ကာကသံဃာ စ၊ မယဉ္စ ပတတံ ဝရာ [ဝရ (က.) မယန္တိပဒဿ ဟိ ဝိသေသနံ]၊

သဗ္ဗေဝ သဒိသာ ဟောမ၊ ဣမံ အာဂမ္မ ပဗ္ဗတံ.

၂၁. ဣဓ သီဟာ စ ဗျဂ္ဃါ စ၊ သိင်္ဂါလာ စ မိဂါဓမာ၊

သဗ္ဗေဝ သဒိသာ ဟောန္တိ၊ အယံ ကော နာမ ပဗ္ဗတော.

၂၂. ဣမံ နေရူတိ [နေရုန္တိ (သီ. သျာ.)] ဇာနန္တိ၊ မနုဿာ ပဗ္ဗတုတ္တမံ၊

ဣဓ ဝဏ္ဏေန သမ္ပန္နာ၊ ဝသန္တိ သဗ္ဗပါဏိနော.

၂၃. အမာနနာ ယတ္ထ သိယာ၊ သန္တာနံ ဝါ ဝိမာနနာ၊

ဟီနသမ္မာနနာ ဝါပိ၊ န တတ္ထ ဝသတိံ ဝသေ [ဝသတီ ဝသေ (သျာ.)၊ ဝသ ဒိဝသေ (ပီ.)].

၂၄. ယတ္ထာလသော စ ဒက္ခော စ၊ သူရော ဘီရု စ ပူဇိယာ၊

န တတ္ထ သန္တော ဝသန္တိ၊ အဝိသေသကရေ နရေ [နဂေ (သီ. သျာ. ပီ.)].

၂၅. နာယံ နေရု ဝိဘဇတိ၊ ဟီနဥက္ကဋ္ဌမဇ္ဈိမေ၊

အဝိသေသကရော နေရု၊ ဟန္ဒ နေရုံ ဇဟာမသေတိ.

နေရုဇာတကံ စတုတ္ထံ.