၃၄၄. အမ္ဗဇာတကံ (၄-၅-၄)

၁၇၃. ယော နီလိယံ မဏ္ဍယတိ၊ သဏ္ဍာသေန ဝိဟညတိ၊

တဿ သာ ဝသမနွေတု၊ ယာ တေ အမ္ဗေ အဝါဟရိ.

၁၇၄. ဝီသံ ဝါ ပဉ္စဝီသံ [ပဏ္ဏုဝီသံ (က. သီ. ပီ.)] ဝါ၊ ဦနတိံသံ ဝ ဇာတိယာ၊

တာဒိသာ ပတိ မာ လဒ္ဓါ [ပတိံ မာ လဒ္ဓါ (ပီ.)၊ ပတိ မာ’လတ္ထ (?)]၊ ယာ တေ အမ္ဗေ အဝါဟရိ.

၁၇၅. ဒီဃံ ဂစ္ဆတု အဒ္ဓါနံ၊ ဧကိကာ အဘိသာရိကာ၊

သင်္ကေတေ ပတိ မာ အဒ္ဒ [မာ အဒ္ဒသ (သီ. ပီ.)]၊ ယာ တေ အမ္ဗေ အဝါဟရိ.

၁၇၆. အလင်္ကတာ သုဝသနာ၊ မာလိနီ စန္ဒနုဿဒါ၊

ဧကိကာ သယနေ သေတု၊ ယာ တေ အမ္ဗေ အဝါဟရီတိ.

အမ္ဗဇာတကံ [အမ္ဗစောရဇာတကံ (က. သီ. ပီ.)] စတုတ္ထံ.