၃၃၃. ပက္ကဂေါဓဇာတကံ (၄-၄-၃)

၁၂၉. တဒေဝ မေ တွံ ဝိဒိတော၊ ဝနမဇ္ဈေ ရထေသဘ၊

ယဿ တေ ခဂ္ဂဗဒ္ဓဿ၊ သန္နဒ္ဓဿ တိရီဋိနော၊

အဿတ္ထဒုမသာခါယ၊ ပက္ကာ ဂေါဓာ ပလာယထ.

၁၃၀. နမေ နမန္တဿ ဘဇေ ဘဇန္တံ၊ ကိစ္စာနုကုဗ္ဗဿ ကရေယျ ကိစ္စံ၊

နာနတ္ထကာမဿ ကရေယျ အတ္ထံ၊ အသမ္ဘဇန္တမ္ပိ န သမ္ဘဇေယျ.

၁၃၁. စဇေ စဇန္တံ ဝနထံ န ကယိရာ၊ အပေတစိတ္တေန န သမ္ဘဇေယျ၊

ဒိဇော ဒုမံ ခီဏဖလန္တိ [ဖလံဝ (က. သီ. သျာ. က.)၊ ဒုကနိပါတေ ပုဋဘတ္တဇာတကေန သံသန္ဒေတဗ္ဗံ] ဉတွာ၊ အညံ သမေက္ခေယျ မဟာ ဟိ လောကော.

၁၃၂. သော တေ ကရိဿာမိ ယထာနုဘာဝံ၊ ကတညုတံ ခတ္တိယေ [ခတ္တိယော (သျာ. က.)] ပေက္ခမာနော၊

သဗ္ဗဉ္စ တေ ဣဿရိယံ ဒဒါမိ၊ ယဿိစ္ဆသီ တဿ တုဝံ ဒဒါမီတိ.

ပက္ကဂေါဓဇာတကံ [ဂေါဓဇာတကံ (သီ. သျာ. ပီ.)] တတိယံ.