၃၃၁. ကောကိလဇာတကံ (၄-၄-၁)

၁၂၁. ယော ဝေ ကာလေ အသမ္ပတ္တေ၊ အတိဝေလံ ပဘာသတိ၊

ဧဝံ သော နိဟတော သေတိ၊ ကောကိလာယိဝ အတြဇော.

၁၂၂. န ဟိ သတ္ထံ သုနိသိတံ၊ ဝိသံ ဟလာဟလာမိဝ [ဟလာဟလံ ဣဝ (ပီ.)]၊

ဧဝံ နိကဋ္ဌေ [နိက္ကဍ္ဎေ (သျာ.)၊ နိကဍ္ဎေ (က.)] ပါတေတိ၊ ဝါစာ ဒုဗ္ဘာသိတာ ယထာ.

၁၂၃. တသ္မာ ကာလေ အကာလေ ဝါ [အကာလေ စ (သီ. သျာ.)]၊ ဝါစံ ရက္ခေယျ ပဏ္ဍိတော၊

နာတိဝေလံ ပဘာသေယျ၊ အပိ အတ္တသမမှိ ဝါ.

၁၂၄. ယော စ ကာလေ မိတံ ဘာသေ၊ မတိပုဗ္ဗော ဝိစက္ခဏော၊

သဗ္ဗေ အမိတ္တေ အာဒေတိ၊ သုပဏ္ဏော ဥရဂါမိဝါတိ.

ကောကိလဇာတကံ [ကောကာလိကဇာတကံ (သဗ္ဗတ္ထ)] ပဌမံ.