၁၉. သဋ္ဌိနိပါတော

၅၂၉. သောဏကဇာတကံ (၁)

၁. ‘‘တဿ သုတွာ သတံ ဒမ္မိ၊ သဟဿံ ဒိဋ္ဌ [ဒဋ္ဌု (သီ. ပီ.)] သောဏကံ၊

ကော မေ သောဏကမက္ခာတိ၊ သဟာယံ ပံသုကီဠိတံ’’.

၂. ‘‘အထဗြဝီ မာဏဝကော၊ ဒဟရော ပဉ္စစူဠကော၊

မယှံ သုတွာ သတံ ဒေဟိ၊ သဟဿံ ဒိဋ္ဌ [ဒဋ္ဌု (သီ. ပီ.)] သောဏကံ၊

အဟံ တေ သောဏကက္ခိဿံ [အဟံ သောဏကမက္ခိဿံ (သီ. ပီ.)၊ အဟံ တေ သောဏကမက္ခိဿံ (သျာ.)]၊ သဟာယံ ပံသုကီဠိတံ’’.

၃. ‘‘ကတမသ္မိံ [ကတရသ္မိံ (သီ. သျာ. ပီ.)] သော ဇနပဒေ၊ ရဋ္ဌေသု နိဂမေသု စ၊

ကတ္ထ သောဏကမဒ္ဒက္ခိ [ကတ္ထ တေ သောဏကော ဒိဋ္ဌော (သီ. ပီ.)]၊ တံ မေ အက္ခာဟိ ပုစ္ဆိတော’’.

၄. ‘‘တဝေဝ ဒေဝ ဝိဇိတေ၊ တဝေဝုယျာနဘူမိယာ၊

ဥဇုဝံသာ မဟာသာလာ၊ နီလောဘာသာ မနောရမာ.

၅. ‘‘တိဋ္ဌန္တိ မေဃသမာနာ၊ ရမ္မာ အညောညနိဿိတာ၊

တေသံ မူလမှိ [မူလသ္မိံ (သီ. ပီ.)၊ မူလသ္မိ (သျာ.)] သောဏကော၊ ဈာယတီ အနုပါဒနော [အနုပါဒိနော (သျာ.)၊ အနုပါဒါနော (ပီ.)]၊

ဥပါဒါနေသု လောကေသု၊ ဍယှမာနေသု နိဗ္ဗုတော.

၆. ‘‘တတော စ ရာဇာ ပါယာသိ၊ သေနာယ စတုရင်္ဂိယာ၊

ကာရာပေတွာ သမံ မဂ္ဂံ၊ အဂမာ ယေန သောဏကော.

၇. ‘‘ဥယျာနဘူမိံ ဂန္တွာန၊ ဝိစရန္တော ဗြဟာဝနေ၊

အာသီနံ သောဏကံ ဒက္ခိ၊ ဍယှမာနေသု နိဗ္ဗုတံ’’.

၈. ‘‘ကပဏော ဝတယံ ဘိက္ခု၊ မုဏ္ဍော သင်္ဃာဋိပါရုတော၊

အမာတိကော အပိတိကော၊ ရုက္ခမူလသ္မိ ဈာယတိ’’.

၉. ‘‘ဣမံ ဝါကျံ နိသာမေတွာ၊ သောဏကော ဧတဒဗြဝိ၊

‘န ရာဇ ကပဏော ဟောတိ၊ ဓမ္မံ ကာယေန ဖဿယံ [ဖုသယံ (က.)].

၁၀. ‘ယော စ [ယောဓ (သီ. သျာ.)] ဓမ္မံ နိရံကတွာ [နိရာကတွာ (?)]၊ အဓမ္မမနုဝတ္တတိ၊

သ ရာဇ ကပဏော ဟောတိ၊ ပါပေါ ပါပပရာယနော’’’.

၁၁. ‘‘‘အရိန္ဒမောတိ မေ နာမံ၊ ကာသိရာဇာတိ မံ ဝိဒူ၊

ကစ္စိ ဘောတော သုခဿေယျာ [သုခါ သေယျာ (ပီ.)၊ သုခသေယျော (က.)]၊ ဣဓ ပတ္တဿ သောဏက’’’.

၁၂. ‘‘သဒါပိ ဘဒြမဓနဿ၊ အနာဂါရဿ ဘိက္ခုနော၊

န တေသံ ကောဋ္ဌေ ဩပေန္တိ၊ န ကုမ္ဘိံ န ခဠောပိယံ [န ကုမ္ဘေ န ကဠောပိယာ (သျာ. ပီ.)]၊

ပရနိဋ္ဌိတမေသာနာ၊ တေန ယာပေန္တိ သုဗ္ဗတာ.

၁၃. ‘‘ဒုတိယမ္ပိ ဘဒြမဓနဿ၊ အနာဂါရဿ ဘိက္ခုနော၊

အနဝဇ္ဇပိဏ္ဍော [အနဝဇ္ဇော ပိဏ္ဍာ (ပီ.)] ဘောတ္တဗ္ဗော၊ န စ ကောစူပရောဓတိ.

၁၄. ‘‘တတိယမ္ပိ ဘဒြမဓနဿ၊ အနာဂါရဿ ဘိက္ခုနော၊

နိဗ္ဗုတော ပိဏ္ဍော ဘောတ္တဗ္ဗော၊ န စ ကောစူပရောဓတိ.

၁၅. ‘‘စတုတ္ထမ္ပိ [စတုတ္ထံ (ပီ.)] ဘဒြမဓနဿ၊ အနာဂါရဿ ဘိက္ခုနော၊

မုတ္တဿ ရဋ္ဌေ စရတော၊ သင်္ဂေါ ယဿ န ဝိဇ္ဇတိ.

၁၆. ‘‘ပဉ္စမမ္ပိ [ပဉ္စမံ (ပီ.)] ဘဒြမဓနဿ၊ အနာဂါရဿ ဘိက္ခုနော၊

နဂရမှိ ဍယှမာနမှိ၊ နာဿ ကိဉ္စိ အဍယှထ.

၁၇. ‘‘ဆဋ္ဌမ္ပိ [ဆဋ္ဌံ (ပီ.)] ဘဒြမဓနဿ၊ အနာဂါရဿ ဘိက္ခုနော၊

ရဋ္ဌေ ဝိလုမ္ပမာနမှိ [ဝိလုပ္ပမာနမှိ (က.)]၊ နာဿ ကိဉ္စိ အဟီရထ [အဟာရထ (သီ. သျာ.)].

၁၈. ‘‘သတ္တမမ္ပိ [သတ္တမံ (ပီ.)] ဘဒြမဓနဿ၊ အနာဂါရဿ ဘိက္ခုနော၊

စောရေဟိ ရက္ခိတံ မဂ္ဂံ၊ ယေ စညေ ပရိပန္ထိကာ၊

ပတ္တစီဝရမာဒါယ၊ သောတ္ထိံ ဂစ္ဆတိ သုဗ္ဗတော.

၁၉. ‘‘အဋ္ဌမမ္ပိ [အဋ္ဌမံ (ပီ.)] ဘဒြမဓနဿ၊ အနာဂါရဿ ဘိက္ခုနော၊

ယံ ယံ ဒိသံ ပက္ကမတိ၊ အနပေက္ခောဝ ဂစ္ဆတိ’’.

၂၀. ‘‘ဗဟူပိ ဘဒြာ [ဗဟူနိ သမဏဘဒြာနိ (သီ.)၊ ဗဟူပိ ဘဒြကာ ဧတေ (ပီ.)] ဧတေသံ၊ ယော တွံ ဘိက္ခု ပသံသသိ၊

အဟဉ္စ ဂိဒ္ဓေါ ကာမေသု၊ ကထံ ကာဟာမိ သောဏက.

၂၁. ‘‘ပိယာ မေ မာနုသာ ကာမာ၊ အထော ဒိဗျာပိ မေ ပိယာ၊

အထ ကေန နု ဝဏ္ဏေန၊ ဥဘော လောကေ လဘာမသေ’’.

၂၂. ‘‘ကာမေ ဂိဒ္ဓါ [ကာမေသု ဂိဒ္ဓါ (သီ. ပီ.)] ကာမရတာ၊ ကာမေသု အဓိမုစ္ဆိတာ၊

နရာ ပါပါနိ ကတွာန၊ ဥပပဇ္ဇန္တိ ဒုဂ္ဂတိံ.

၂၃. ‘‘ယေ စ ကာမေ ပဟန္တွာန [ပဟတွာန (သီ. ပီ.)]၊ နိက္ခန္တာ အကုတောဘယာ၊

ဧကောဒိဘာဝါဓိဂတာ၊ န တေ ဂစ္ဆန္တိ ဒုဂ္ဂတိံ.

၂၄. ‘‘ဥပမံ တေ ကရိဿာမိ၊ တံ သုဏောဟိ အရိန္ဒမ၊

ဥပမာယ မိဓေကစ္စေ [ပိဓေကစ္စေ (သီ. ပီ.)]၊ အတ္ထံ ဇာနန္တိ ပဏ္ဍိတာ.

၂၅. ‘‘ဂင်္ဂါယ ကုဏပံ ဒိသွာ၊ ဝုယှမာနံ မဟဏ္ဏဝေ၊

ဝါယသော သမစိန္တေသိ၊ အပ္ပပညော အစေတသော.

၂၆. ‘‘‘ယာနဉ္စ ဝတိဒံ လဒ္ဓံ၊ ဘက္ခော စာယံ အနပ္ပကော’၊

တတ္ထ ရတ္တိံ တတ္ထ ဒိဝါ၊ တတ္ထေဝ နိရတော မနော.

၂၇. ‘‘ခါဒံ နာဂဿ မံသာနိ၊ ပိဝံ ဘာဂီရထောဒကံ [ဘာဂိရသောဒကံ (သီ. သျာ. ပီ. က.)]၊

သမ္ပဿံ ဝနစေတျာနိ၊ န ပလေတ္ထ [ပလေတွာ (က.)] ဝိဟင်္ဂမော.

၂၈. ‘‘တဉ္စ [တံဝ (ပီ.)] ဩတရဏီ ဂင်္ဂါ၊ ပမတ္တံ ကုဏပေ ရတံ၊

သမုဒ္ဒံ အဇ္ဈဂါဟာသိ [အဇ္ဈဂါဟယိ (ပီ.)]၊ အဂတီ ယတ္ထ ပက္ခိနံ.

၂၉. ‘‘သော စ ဘက္ခပရိက္ခီဏော၊ ဥဒပတွာ [ဥပ္ပတိတွာ (သီ. သျာ.)၊ ဥဒါပတွာ (ပီ.)] ဝိဟင်္ဂမော.

န ပစ္ဆတော န ပုရတော၊ နုတ္တရံ နောပိ ဒက္ခိဏံ.

၃၀. ‘‘ဒီပံ သော နဇ္ဈဂါဂဉ္ဆိ [န အဇ္ဈဂဉ္ဆိ (သီ.)၊ န အဇ္ဈဂစ္ဆိ (ပီ.)]၊ အဂတီ ယတ္ထ ပက္ခိနံ၊

သော စ တတ္ထေဝ ပါပတ္ထ၊ ယထာ ဒုဗ္ဗလကော တထာ.

၃၁. ‘‘တဉ္စ သာမုဒ္ဒိကာ မစ္ဆာ၊ ကုမ္ဘီလာ မကရာ သုသူ၊

ပသယှကာရာ ခါဒိံသု၊ ဖန္ဒမာနံ ဝိပက္ခကံ [ဝိပက္ခိနံ (သီ. ပီ.)၊ ဝိပက္ခိကံ (သျာ.)].

၃၂. ‘‘ဧဝမေဝ တုဝံ ရာဇ၊ ယေ စညေ ကာမဘောဂိနော၊

ဂိဒ္ဓါ စေ န ဝမိဿန္တိ၊ ကာကပညာဝ [ကာကပညာယ (သီ. သျာ. ပီ.)] တေ ဝိဒူ.

၃၃. ‘‘ဧသာ တေ ဥပမာ ရာဇ၊ အတ္ထသန္ဒဿနီ ကတာ၊

တွဉ္စ ပညာယသေ တေန၊ ယဒိ ကာဟသိ ဝါ န ဝါ.

၃၄. ‘‘ဧကဝါစမ္ပိ ဒွိဝါစံ၊ ဘဏေယျ အနုကမ္ပကော၊

တတုတ္တရိံ န ဘာသေယျ၊ ဒါသောဝယျဿ [ဒါသော အယျဿ (သီ.)၊ ဒါသော အယိရဿ (ပီ.)] သန္တိကေ’’.

၃၅. ‘‘ဣဒံ ဝတွာန ပက္ကာမိ၊ သောဏကော အမိတဗုဒ္ဓိမာ [သောဏကော’မိတဗုဒ္ဓိမာ (?)]၊

ဝေဟာသေ အန္တလိက္ခသ္မိံ၊ အနုသာသိတွာန ခတ္တိယံ’’.

၃၆. ‘‘ကော နုမေ ရာဇကတ္တာရော၊ သုဒ္ဒါ ဝေယျတ္တမာဂတာ [သူတာ ဝေယျတ္တိမာဂတာ (သီ. သျာ. ပီ.)]၊

ရဇ္ဇံ နိယျာဒယိဿာမိ၊ နာဟံ ရဇ္ဇေန မတ္ထိကော.

၃၇. ‘‘အဇ္ဇေဝ ပဗ္ဗဇိဿာမိ၊ ကော ဇညာ မရဏံ သုဝေ၊

မာဟံ ကာကောဝ ဒုမ္မေဓော၊ ကာမာနံ ဝသမနွဂံ’’ [ဝသမန္နဂါ (ပီ.)].

၃၈. ‘‘အတ္ထိ တေ ဒဟရော ပုတ္တော၊ ဒီဃာဝု ရဋ္ဌဝဍ္ဎနော၊

တံ ရဇ္ဇေ အဘိသိဉ္စဿု၊ သော နော ရာဇာ ဘဝိဿတိ’’.

၃၉. ‘‘ခိပ္ပံ ကုမာရမာနေထ၊ ဒီဃာဝုံ ရဋ္ဌဝဍ္ဎနံ၊

တံ ရဇ္ဇေ အဘိသိဉ္စိဿံ၊ သော ဝေါ ရာဇာ ဘဝိဿတိ’’.

၄၀. ‘‘တတော ကုမာရမာနေသုံ၊ ဒီဃာဝုံ ရဋ္ဌဝဍ္ဎနံ၊

တံ ဒိသွာ အာလပီ ရာဇာ၊ ဧကပုတ္တံ မနောရမံ.

၄၁. ‘‘သဋ္ဌိ ဂါမသဟဿာနိ၊ ပရိပုဏ္ဏာနိ သဗ္ဗသော၊

တေ ပုတ္တ ပဋိပဇ္ဇဿု၊ ရဇ္ဇံ နိယျာဒယာမိ တေ.

၄၂. ‘‘အဇ္ဇေဝ ပဗ္ဗဇိဿာမိ၊ ကော ဇညာ မရဏံ သုဝေ၊

မာဟံ ကာကောဝ ဒုမ္မေဓော၊ ကာမာနံ ဝသမနွဂံ [ဝသမန္နဂါ (ပီ.)].

၄၃. ‘‘သဋ္ဌိ နာဂသဟဿာနိ၊ သဗ္ဗာလင်္ကာရဘူသိတာ၊

သုဝဏ္ဏကစ္ဆာ မာတင်္ဂါ၊ ဟေမကပ္ပနဝါသသာ.

၄၄. ‘‘အာရူဠှာ ဂါမဏီယေဟိ၊ တောမရင်္ကုသပါဏိဘိ၊

တေ ပုတ္တ ပဋိပဇ္ဇဿု၊ ရဇ္ဇံ နိယျာဒယာမိ တေ.

၄၅. ‘‘အဇ္ဇေဝ ပဗ္ဗဇိဿာမိ၊ ကော ဇညာ မရဏံ သုဝေ၊

မာဟံ ကာကောဝ ဒုမ္မေဓော၊ ကာမာနံ ဝသမနွဂံ.

၄၆. ‘‘သဋ္ဌိ အဿသဟဿာနိ၊ သဗ္ဗာလင်္ကာရဘူသိတာ၊

အာဇာနီယာဝ ဇာတိယာ၊ သိန္ဓဝါ သီဃဝါဟိနော.

၄၇. ‘‘အာရူဠှာ ဂါမဏီယေဟိ၊ ဣလ္လိယာစာပဓာရိဘိ [ဣန္ဒိယာစာပဓာရိဘိ (က.)]၊

တေ ပုတ္တ ပဋိပဇ္ဇဿု၊ ရဇ္ဇံ နိယျာဒယာမိ တေ.

၄၈. ‘‘အဇ္ဇေဝ ပဗ္ဗဇိဿာမိ၊ ကော ဇညာ မရဏံ သုဝေ၊

မာဟံ ကာကောဝ ဒုမ္မေဓော၊ ကာမာနံ ဝသမနွဂံ.

၄၉. ‘‘သဋ္ဌိ ရထသဟဿာနိ၊ သန္နဒ္ဓါ ဥဿိတဒ္ဓဇာ၊

ဒီပါ အထောပိ ဝေယျဂ္ဃါ၊ သဗ္ဗာလင်္ကာရဘူသိတာ.

၅၀. ‘‘အာရူဠှာ ဂါမဏီယေဟိ၊ စာပဟတ္ထေဟိ ဝမ္မိဘိ၊

တေ ပုတ္တ ပဋိပဇ္ဇဿု၊ ရဇ္ဇံ နိယျာဒယာမိ တေ.

၅၁. ‘‘အဇ္ဇေဝ ပဗ္ဗဇိဿာမိ၊ ကော ဇညာ မရဏံ သုဝေ၊

မာဟံ ကာကောဝ ဒုမ္မေဓော၊ ကာမာနံ ဝသမနွဂံ.

၅၂. ‘‘သဋ္ဌိ ဓေနုသဟဿာနိ၊ ရောဟညာ ပုင်္ဂဝူသဘာ၊

တာ ပုတ္တ ပဋိပဇ္ဇဿု၊ ရဇ္ဇံ နိယျာဒယာမိ တေ.

၅၃. ‘‘အဇ္ဇေဝ ပဗ္ဗဇိဿာမိ၊ ကော ဇညာ မရဏံ သုဝေ၊

မာဟံ ကာကောဝ ဒုမ္မေဓော၊ ကာမာနံ ဝသမနွဂံ.

၅၄. ‘‘သောဠသိတ္ထိသဟဿာနိ၊ သဗ္ဗာလင်္ကာရဘူသိတာ၊

ဝိစိတြဝတ္ထာဘရဏာ၊ အာမုတ္တမဏိကုဏ္ဍလာ၊

တာ ပုတ္တ ပဋိပဇ္ဇဿု၊ ရဇ္ဇံ နိယျာဒယာမိ တေ.

၅၅. ‘‘အဇ္ဇေဝ ပဗ္ဗဇိဿာမိ၊ ကော ဇညာ မရဏံ သုဝေ၊

မာဟံ ကာကောဝ ဒုမ္မေဓော၊ ကာမာနံ ဝသမနွဂံ’’.

၅၆. ‘‘ဒဟရဿေဝ မေ တာတ၊ မာတာ မတာတိ မေ သုတံ၊

တယာ ဝိနာ အဟံ တာတ၊ ဇီဝိတုမ္ပိ န ဥဿဟေ.

၅၇. ‘‘ယထာ အာရညကံ နာဂံ၊ ပေါတော အနွေတိ ပစ္ဆတော၊

ဇေဿန္တံ ဂိရိဒုဂ္ဂေသု၊ သမေသု ဝိသမေသု စ.

၅၈. ‘‘ဧဝံ တံ အနုဂစ္ဆာမိ၊ ပုတ္တမာဒါယ [ပတ္တမာဒါယ (ပီ.)] ပစ္ဆတော၊

သုဘရော တေ ဘဝိဿာမိ၊ န တေ ဟေဿာမိ ဒုဗ္ဘရော’’.

၅၉. ‘‘ယထာ သာမုဒ္ဒိကံ နာဝံ၊ ဝါဏိဇာနံ ဓနေသိနံ၊

ဝေါဟာရော တတ္ထ ဂဏှေယျ၊ ဝါဏိဇာ ဗျသနီ [ဗျသနံ (က.)] သိယာ.

၆၀. ‘‘ဧဝမေဝါယံ ပုတ္တကလိ [ပုတ္တက (သျာ.)]၊ အန္တရာယကရော မမ [မမံ (ပီ.)]၊

ဣမံ ကုမာရံ ပါပေထ၊ ပါသာဒံ ရတိဝဍ္ဎနံ.

၆၁. ‘‘တတ္ထ ကမ္ဗုသဟတ္ထာယော၊ ယထာ သက္ကံဝ အစ္ဆရာ၊

တာ နံ တတ္ထ ရမေဿန္တိ [ရမိဿန္တိ (သျာ. က.)]၊ တာဟိ စေသော [မေသော (ပီ.)] ရမိဿတိ.

၆၂. ‘‘တတော ကုမာရံ ပါပေသုံ၊ ပါသာဒံ ရတိဝဍ္ဎနံ၊

တံ ဒိသွာ အဝစုံ ကညာ၊ ဒီဃာဝုံ ရဋ္ဌဝဍ္ဎနံ.

၆၃. ‘‘ဒေဝတာ နုသိ ဂန္ဓဗ္ဗော၊ အဒု [အာဒု (သီ. ပီ.)] သက္ကော ပုရိန္ဒဒေါ၊

ကော ဝါ တွံ ကဿ ဝါ ပုတ္တော၊ ကထံ ဇာနေမု တံ မယံ’’.

၆၄. ‘‘နမှိ ဒေဝေါ န ဂန္ဓဗ္ဗော၊ နာပိ [နမှိ (က.)] သက္ကော ပုရိန္ဒဒေါ၊

ကာသိရညော အဟံ ပုတ္တော၊ ဒီဃာဝု ရဋ္ဌဝဍ္ဎနော၊

မမံ [မမ (ပီ.)] ဘရထ ဘဒ္ဒံ ဝေါ [ဘဒ္ဒန္တေ (က.)]၊ အဟံ ဘတ္တာ ဘဝါမိ ဝေါ’’.

၆၅. ‘‘တံ တတ္ထ အဝစုံ ကညာ၊ ဒီဃာဝုံ ရဋ္ဌဝဍ္ဎနံ၊

‘ကုဟိံ ရာဇာ အနုပ္ပတ္တော၊ ဣတော ရာဇာ ကုဟိံ ဂတော’’’.

၆၆. ‘‘ပင်္ကံ ရာဇာ အတိက္ကန္တော၊ ထလေ ရာဇာ ပတိဋ္ဌိတော၊

အကဏ္ဋကံ အဂဟနံ၊ ပဋိပန္နော မဟာပထံ.

၆၇. ‘‘အဟဉ္စ ပဋိပန္နောသ္မိ၊ မဂ္ဂံ ဒုဂ္ဂတိဂါမိနံ၊

သကဏ္ဋကံ သဂဟနံ၊ ယေန ဂစ္ဆန္တိ ဒုဂ္ဂတိံ’’.

၆၈. ‘‘တဿ တေ သွာဂတံ ရာဇ၊ သီဟဿေဝ ဂိရိဗ္ဗဇံ၊

အနုသာသ မဟာရာဇ၊ တွံ နော သဗ္ဗာသမိဿရော’’တိ.

သောဏကဇာတကံ ပဌမံ.

၅၃၀. သံကိစ္စဇာတကံ (၂)

၆၉. ‘‘ဒိသွာ နိသိန္နံ ရာဇာနံ၊ ဗြဟ္မဒတ္တံ ရထေသဘံ၊

အထဿ ပဋိဝေဒေသိ၊ ယဿာသိ အနုကမ္ပကော.

၇၀. ‘‘သံကိစ္စာယံ အနုပ္ပတ္တော၊ ဣသီနံ သာဓုသမ္မတော၊

တရမာနရူပေါ နိယျာဟိ၊ ခိပ္ပံ ပဿ မဟေသိနံ.