၄၈၄. သာလိကေဒါရဇာတကံ (၁)

၁. သမ္ပန္နံ သာလိကေဒါရံ၊ သုဝါ ဘုဉ္ဇန္တိ ကောသိယ၊

ပဋိဝေဒေမိ တေ ဗြဟ္မေ၊ န နေ [တေ (သီ. သျာ.)၊ နံ (သီ. သျာ. ပီ. အဋ္ဌ.)၊ တံ (က. အဋ္ဌ.)] ဝါရေတုမုဿဟေ.

၂. ဧကော စ တတ္ထ သကုဏော၊ ယော နေသံ [တေသံ (သီ. အဋ္ဌ.)] သဗ္ဗသုန္ဒရော၊

ဘုတွာ သာလိံ ယထာကာမံ၊ တုဏ္ဍေနာဒါယ ဂစ္ဆတိ.

၃. ဩဍ္ဍေန္တု [ဥဇ္ဈုန္တု (သျာ. က.) အင်္ဂုတ္တရနိကာယေ ပဿိတဗ္ဗံ] ဝါဠပါသာနိ၊ ယထာ ဝဇ္ဈေထ သော ဒိဇော၊

ဇီဝဉ္စ နံ ဂဟေတွာန၊ အာနယေဟိ [အာနယေထ (သီ. ပီ.)] မမန္တိကေ.

၄. ဧတေ ဘုတွာ ပိဝိတွာ စ [ဘုတွာ စ ပိတွာ စ (ပီ.)]၊ ပက္ကမန္တိ ဝိဟင်္ဂမာ၊

ဧကော ဗဒ္ဓေါသ္မိ ပါသေန၊ ကိံ ပါပံ ပကတံ မယာ.

၅. ဥဒရံ နူန အညေသံ၊ သုဝ အစ္စောဒရံ တဝ၊

ဘုတွာ သာလိံ ယထာကာမံ၊ တုဏ္ဍေနာဒါယ ဂစ္ဆသိ.

၆. ကောဋ္ဌံ နု တတ္ထ ပူရေသိ၊ သုဝ ဝေရံ နု တေ မယာ၊

ပုဋ္ဌော မေ သမ္မ အက္ခာဟိ၊ ကုဟိံ သာလိံ နိဒါဟသိ [နိဓီယသိ (ပီ.)].

၇. န မေ ဝေရံ တယာ သဒ္ဓိံ၊ ကောဋ္ဌော မယှံ န ဝိဇ္ဇတိ၊

ဣဏံ မုဉ္စာမိဏံ ဒမ္မိ၊ သမ္ပတ္တော ကောဋသိမ္ဗလိံ၊

နိဓိမ္ပိ တတ္ထ နိဒဟာမိ၊ ဧဝံ ဇာနာဟိ ကောသိယ.

၈. ကီဒိသံ တေ ဣဏဒါနံ၊ ဣဏမောက္ခော စ ကီဒိသော၊

နိဓိနိဓာနမက္ခာဟိ၊ အထ ပါသာ ပမောက္ခသိ.

၉. အဇာတပက္ခာ တရုဏာ၊ ပုတ္တကာ မယှ ကောသိယ၊

တေ မံ ဘတာ ဘရိဿန္တိ၊ တသ္မာ တေသံ ဣဏံ ဒဒေ.

၁၀. မာတာ ပိတာ စ မေ ဝုဒ္ဓါ၊ ဇိဏ္ဏကာ ဂတယောဗ္ဗနာ၊

တေသံ တုဏ္ဍေန ဟာတူန၊ မုဉ္စေ ပုဗ္ဗကတံ [ပုဗ္ဗေ ကတံ (သီ.)] ဣဏံ.

၁၁. အညေပိ တတ္ထ သကုဏာ၊ ခီဏပက္ခာ သုဒုဗ္ဗလာ၊

တေသံ ပုညတ္ထိကော ဒမ္မိ၊ တံ နိဓိံ အာဟု ပဏ္ဍိတာ.

၁၂. ဤဒိသံ [ဧဒိသံ (သီ. ပီ.)] မေ ဣဏဒါနံ၊ ဣဏမောက္ခော စ ဤဒိသော၊

နိဓိနိဓာနမက္ခာမိ [နိဓိံ နိဓာနံ အက္ခာတံ (သီ. ပီ.)]၊ ဧဝံ ဇာနာဟိ ကောသိယ.

၁၃. ဘဒ္ဒကော ဝတယံ ပက္ခီ၊ ဒိဇော ပရမဓမ္မိကော၊

ဧကစ္စေသု မနုဿေသု၊ အယံ ဓမ္မော န ဝိဇ္ဇတိ.

၁၄. ဘုဉ္ဇ သာလိံ ယထာကာမံ၊ သဟ သဗ္ဗေဟိ ဉာတိဘိ၊

ပုနာပိ သုဝ ပဿေမု၊ ပိယံ မေ တဝ ဒဿနံ.

၁၅. ဘုတ္တဉ္စ ပီတဉ္စ တဝဿမမှိ [တဝဿဗျမှိ (က.)]၊ ရတ္တိဉ္စ [ရတီ စ (သီ. ပီ.)] နော ကောသိယ တေ သကာသေ၊

နိက္ခိတ္တဒဏ္ဍေသု ဒဒါဟိ ဒါနံ၊ ဇိဏ္ဏေ စ မာတာပိတရော ဘရဿု.

၁၆. လက္ခီ ဝတ မေ ဥဒပါဒိ အဇ္ဇ၊ ယော အဒ္ဒသာသိံ ပဝရံ [ယောဟံ အဒဿံ ပရမံ (သျာ. က.)] ဒိဇာနံ၊

သုဝဿ သုတွာန သုဘာသိတာနိ၊ ကာဟာမိ ပုညာနိ အနပ္ပကာနိ.

၁၇. သော ကောသိယော အတ္တမနော ဥဒဂ္ဂေါ၊ အန္နဉ္စ ပါနဉ္စဘိသင်္ခရိတွာ [အန္နဉ္စ ပါနံ အဘိသံဟရိတွာ (က.)]၊

အန္နေန ပါနေန ပသန္နစိတ္တော၊ သန္တပ္ပယိ သမဏဗြာဟ္မဏေ စာတိ.

သာလိကေဒါရဇာတကံ [ကေဒါရဇာတကံ (က.)] ပဌမံ.