၉. ဒါနသုတ္တံ

၉၈. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘ဒွေမာနိ၊ ဘိက္ခဝေ၊ ဒါနာနိ – အာမိသဒါနဉ္စ ဓမ္မဒါနဉ္စ. ဧတဒဂ္ဂံ၊ ဘိက္ခဝေ၊ ဣမေသံ ဒွိန္နံ ဒါနာနံ ယဒိဒံ – ဓမ္မဒါနံ.

‘‘ဒွေမေ၊ ဘိက္ခဝေ၊ သံဝိဘာဂါ – အာမိသသံဝိဘာဂေါ စ ဓမ္မသံဝိဘာဂေါ စ. ဧတဒဂ္ဂံ၊ ဘိက္ခဝေ၊ ဣမေသံ ဒွိန္နံ သံဝိဘာဂါနံ ယဒိဒံ – ဓမ္မသံဝိဘာဂေါ.

‘‘ဒွေမေ၊ ဘိက္ခဝေ၊ အနုဂ္ဂဟာ – အာမိသာနုဂ္ဂဟော စ ဓမ္မာနုဂ္ဂဟော စ. ဧတဒဂ္ဂံ၊ ဘိက္ခဝေ၊ ဣမေသံ ဒွိန္နံ အနုဂ္ဂဟာနံ ယဒိဒံ – ဓမ္မာနုဂ္ဂဟော’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘ယမာဟု ဒါနံ ပရမံ အနုတ္တရံ၊ ယံ သံဝိဘာဂံ ဘဂဝါ အဝဏ္ဏယိ [အဝဏ္ဏယီ (သီ.)]၊

အဂ္ဂမှိ ခေတ္တမှိ ပသန္နစိတ္တော၊ ဝိညူ ပဇာနံ ကော န ယဇေထ ကာလေ.

‘‘ယေ စေဝ ဘာသန္တိ သုဏန္တိ စူဘယံ၊ ပသန္နစိတ္တာ သုဂတဿ သာသနေ၊

တေသံ သော အတ္ထော ပရမော ဝိသုဇ္ဈတိ၊ ယေ အပ္ပမတ္တာ သုဂတဿ သာသနေ’’တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. နဝမံ.