၂. စက္ခုသုတ္တံ

၆၁. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘တီဏိမာနိ၊ ဘိက္ခဝေ၊ စက္ခူနိ. ကတမာနိ တီဏိ? မံသစက္ခု၊ ဒိဗ္ဗစက္ခု၊ ပညာစက္ခု – ဣမာနိ ခေါ၊ ဘိက္ခဝေ၊ တီဏိ စက္ခူနီ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘မံသစက္ခု ဒိဗ္ဗစက္ခု၊ ပညာစက္ခု အနုတ္တရံ၊

ဧတာနိ တီဏိ စက္ခူနိ၊ အက္ခာသိ ပုရိသုတ္တမော.

‘‘မံသစက္ခုဿ ဥပ္ပါဒေါ၊ မဂ္ဂေါ ဒိဗ္ဗဿ စက္ခုနော၊

ယတော ဉာဏံ ဥဒပါဒိ၊ ပညာစက္ခု အနုတ္တရံ၊

ယဿ စက္ခုဿ ပဋိလာဘာ၊ သဗ္ဗဒုက္ခာ ပမုစ္စတီ’’တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. ဒုတိယံ.