၉. တဏှာသုတ္တံ

၅၈. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘တိဿော ဣမာ၊ ဘိက္ခဝေ၊ တဏှာ. ကတမာ တိဿော? ကာမတဏှာ၊ ဘဝတဏှာ၊ ဝိဘဝတဏှာ – ဣမာ ခေါ၊ ဘိက္ခဝေ၊ တိဿော တဏှာ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘တဏှာယောဂေန သံယုတ္တာ၊ ရတ္တစိတ္တာ ဘဝါဘဝေ၊

တေ ယောဂယုတ္တာ မာရဿ၊ အယောဂက္ခေမိနော ဇနာ၊

သတ္တာ ဂစ္ဆန္တိ သံသာရံ၊ ဇာတီမရဏဂါမိနော.

‘‘ယေ စ တဏှံ ပဟန္တွာန၊ ဝီတတဏှာ [နိက္ကဏှာ စ (သီ. က.)] ဘဝါဘဝေ၊

တေ ဝေ [တေ စ (သီ. ပီ. က.)] ပါရင်္ဂတာ [ပါရဂတာ (က. သီ. သျာ.)] လောကေ၊ ယေ ပတ္တာ အာသဝက္ခယ’’န္တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. နဝမံ.