၂. ဓာတုသုတ္တံ

၅၁. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘တိဿော ဣမာ၊ ဘိက္ခဝေ၊ ဓာတုယော. ကတမာ တိဿော? ရူပဓာတု၊ အရူပဓာတု၊ နိရောဓဓာတု – ဣမာ ခေါ၊ ဘိက္ခဝေ၊ တိဿော ဓာတုယော’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘ရူပဓာတုံ [ရူပဓာတု (သဗ္ဗတ္ထ)] ပရိညာယ၊ အရူပေသု အသဏ္ဌိတာ၊

နိရောဓေ ယေ ဝိမုစ္စန္တိ၊ တေ ဇနာ မစ္စုဟာယိနော.

‘‘ကာယေန အမတံ ဓာတုံ၊ ဖုသယိတွာ [ဖုဿယိတွာ (သျာ.)၊ ဖဿယိတွာ (ပီ.)] နိရူပဓိံ၊

ဥပဓိပ္ပဋိနိဿဂ္ဂံ၊ သစ္ဆိကတွာ အနာသဝေါ၊

ဒေသေတိ သမ္မာသမ္ဗုဒ္ဓေါ၊ အသောကံ ဝိရဇံ ပဒ’’န္တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. ဒုတိယံ.