၆. အဇာတသုတ္တံ

၄၃. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘အတ္ထိ၊ ဘိက္ခဝေ၊ အဇာတံ အဘူတံ အကတံ အသင်္ခတံ. နော စေတံ၊ ဘိက္ခဝေ၊ အဘဝိဿ အဇာတံ အဘူတံ အကတံ အသင်္ခတံ၊ နယိဓ ဇာတဿ ဘူတဿ ကတဿ သင်္ခတဿ နိဿရဏံ ပညာယေထ. ယသ္မာ စ ခေါ၊ ဘိက္ခဝေ၊ အတ္ထိ အဇာတံ အဘူတံ အကတံ အသင်္ခတံ၊ တသ္မာ ဇာတဿ ဘူတဿ ကတဿ သင်္ခတဿ နိဿရဏံ ပညာယတီ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘ဇာတံ ဘူတံ သမုပ္ပန္နံ၊ ကတံ သင်္ခတမဒ္ဓုဝံ၊

ဇရာမရဏသင်္ဃာဋံ၊ ရောဂနီဠံ [ရောဂနိဍ္ဎံ (သီ.)] ပဘင်္ဂုရံ [ပဘင်္ဂုနံ (က. သီ. က.)၊ ပဘင်္ဂုဏံ (သျာ.)].

‘‘အာဟာရနေတ္တိပ္ပဘဝံ၊ နာလံ တဒဘိနန္ဒိတုံ၊

တဿ နိဿရဏံ သန္တံ၊ အတက္ကာဝစရံ ဓုဝံ.

‘‘အဇာတံ အသမုပ္ပန္နံ၊ အသောကံ ဝိရဇံ ပဒံ၊

နိရောဓော ဒုက္ခဓမ္မာနံ၊ သင်္ခါရူပသမော သုခေါ’’တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. ဆဋ္ဌံ.