၇. အာတာပီသုတ္တံ

၃၄. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘အနာတာပီ၊ ဘိက္ခဝေ၊ ဘိက္ခု အနောတ္တာပီ [အနောတ္တပ္ပီ (ဗဟူသု) အဋ္ဌကထာ ပဿိတဗ္ဗာ] အဘဗ္ဗော သမ္ဗောဓာယ၊ အဘဗ္ဗော နိဗ္ဗာနာယ၊ အဘဗ္ဗော အနုတ္တရဿ ယောဂက္ခေမဿ အဓိဂမာယ. အာတာပီ စ ခေါ၊ ဘိက္ခဝေ၊ ဘိက္ခု ဩတ္တာပီ [ဩတ္တပ္ပီ (ဗဟူသု)] ဘဗ္ဗော သမ္ဗောဓာယ၊ ဘဗ္ဗော နိဗ္ဗာနာယ၊ ဘဗ္ဗော အနုတ္တရဿ ယောဂက္ခေမဿ အဓိဂမာယာ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘အနာတာပီ အနောတ္တာပီ၊ ကုသီတော ဟီနဝီရိယော၊

ယော ထီနမိဒ္ဓဗဟုလော၊ အဟိရီကော အနာဒရော၊

အဘဗ္ဗော တာဒိသော ဘိက္ခု၊ ဖုဋ္ဌုံ သမ္ဗောဓိမုတ္တမံ.

‘‘ယော စ သတိမာ နိပကော ဈာယီ၊ အာတာပီ ဩတ္တာပီ စ အပ္ပမတ္တော၊

သံယောဇနံ ဇာတိဇရာယ ဆေတွာ၊ ဣဓေဝ သမ္ဗောဓိမနုတ္တရံ ဖုသေ’’တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. သတ္တမံ.