၄. အတပနီယသုတ္တံ

၃၁. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘ဒွေမေ၊ ဘိက္ခဝေ၊ ဓမ္မာ အတပနီယာ. ကတမေ ဒွေ? ဣဓ၊ ဘိက္ခဝေ၊ ဧကစ္စော ကတကလျာဏော ဟောတိ၊ ကတကုသလော၊ ကတဘီရုတ္တာဏော၊ အကတပါပေါ၊ အကတလုဒ္ဒေါ၊ အကတကိဗ္ဗိသော. သော ‘ကတံ မေ ကလျာဏ’န္တိပိ န တပ္ပတိ၊ ‘အကတံ မေ ပါပ’န္တိပိ န တပ္ပတိ. ဣမေ ခေါ၊ ဘိက္ခဝေ၊ ဒွေ ဓမ္မာ အတပနီယာ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘ကာယဒုစ္စရိတံ ဟိတွာ၊ ဝစီဒုစ္စရိတာနိ စ၊

မနောဒုစ္စရိတံ ဟိတွာ၊ ယဉ္စညံ ဒေါသသဉှိတံ.

‘‘အကတွာကုသလံ ကမ္မံ၊ ကတွာန ကုသလံ ဗဟုံ၊

ကာယဿ ဘေဒါ သပ္ပညော၊ သဂ္ဂံ သော ဥပပဇ္ဇတီ’’တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. စတုတ္ထံ.