၂. သုခဝိဟာရသုတ္တံ

၂၉. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘ဒွီဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု ဒိဋ္ဌေဝ ဓမ္မေ သုခံ ဝိဟရတိ အဝိဃာတံ အနုပါယာသံ အပရိဠာဟံ၊ ကာယဿ ဘေဒါ ပရံ မရဏာ သုဂတိ ပါဋိကင်္ခါ. ကတမေဟိ ဒွီဟိ? ဣန္ဒြိယေသု ဂုတ္တဒွါရတာယ စ၊ ဘောဇနေ မတ္တညုတာယ စ. ဣမေဟိ ခေါ၊ ဘိက္ခဝေ၊ ဒွီဟိ ဓမ္မေဟိ သမန္နာဂတော ဘိက္ခု ဒိဋ္ဌေဝ ဓမ္မေ သုခံ ဝိဟရတိ အဝိဃာတံ အနုပါယာသံ အပရိဠာဟံ၊ ကာယဿ ဘေဒါ ပရံ မရဏာ သုဂတိ ပါဋိကင်္ခါ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘စက္ခု သောတဉ္စ ဃာနဉ္စ၊ ဇိဝှါ ကာယော တထာ [အထော (သီ. သျာ. က.)] မနော၊

ဧတာနိ ယဿ ဒွါရာနိ၊ သုဂုတ္တာနိဓ ဘိက္ခုနော.

‘‘ဘောဇနမှိ စ မတ္တညူ၊ ဣန္ဒြိယေသု စ သံဝုတော၊

ကာယသုခံ စေတောသုခံ၊ သုခံ သော အဓိဂစ္ဆတိ.

‘‘အဍယှမာနေန ကာယေန၊ အဍယှမာနေန စေတသာ၊

ဒိဝါ ဝါ ယဒိ ဝါ ရတ္တိံ၊ သုခံ ဝိဟရတိ တာဒိသော’’တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. ဒုတိယံ.