၆. ဒါနသုတ္တံ

၂၆. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘ဧဝဉ္စေ၊ ဘိက္ခဝေ၊ သတ္တာ ဇာနေယျုံ ဒါနသံဝိဘာဂဿ ဝိပါကံ ယထာဟံ ဇာနာမိ၊ န အဒတွာ ဘုဉ္ဇေယျုံ၊ န စ နေသံ မစ္ဆေရမလံ စိတ္တံ ပရိယာဒါယ တိဋ္ဌေယျ. ယောပိ နေသံ အဿ စရိမော အာလောပေါ စရိမံ ကဗဠံ၊ တတောပိ န အသံဝိဘဇိတွာ ဘုဉ္ဇေယျုံ၊ သစေ နေသံ ပဋိဂ္ဂါဟကာ အဿု. ယသ္မာ စ ခေါ၊ ဘိက္ခဝေ၊ သတ္တာ န ဧဝံ ဇာနန္တိ ဒါနသံဝိဘာဂဿ ဝိပါကံ ယထာဟံ ဇာနာမိ၊ တသ္မာ အဒတွာ ဘုဉ္ဇန္တိ၊ မစ္ဆေရမလဉ္စ နေသံ စိတ္တံ ပရိယာဒါယ တိဋ္ဌတီ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘ဧဝံ စေ သတ္တာ ဇာနေယျုံ၊ ယထာဝုတ္တံ မဟေသိနာ၊

ဝိပါကံ သံဝိဘာဂဿ၊ ယထာ ဟောတိ မဟပ္ဖလံ.

‘‘ဝိနေယျ မစ္ဆေရမလံ၊ ဝိပ္ပသန္နေန စေတသာ၊

ဒဇ္ဇုံ ကာလေန အရိယေသု၊ ယတ္ထ ဒိန္နံ မဟပ္ဖလံ.

‘‘အန္နဉ္စ ဒတွာ [ဒတွာန (သျာ.)] ဗဟုနော၊ ဒက္ခိဏေယျေသု ဒက္ခိဏံ၊

ဣတော စုတာ မနုဿတ္တာ၊ သဂ္ဂံ ဂစ္ဆန္တိ ဒါယကာ.

‘‘တေ စ သဂ္ဂဂတာ [သဂ္ဂံ ဂတာ (သီ. ပီ. က.)] တတ္ထ၊ မောဒန္တိ ကာမကာမိနော၊

ဝိပါကံ သံဝိဘာဂဿ၊ အနုဘောန္တိ အမစ္ဆရာ’’တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. ဆဋ္ဌံ.