၇. သဗ္ဗပရိညာသုတ္တံ

၇. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘သဗ္ဗံ၊ ဘိက္ခဝေ၊ အနဘိဇာနံ အပရိဇာနံ တတ္ထ စိတ္တံ အဝိရာဇယံ အပ္ပဇဟံ အဘဗ္ဗော ဒုက္ခက္ခယာယ. သဗ္ဗဉ္စ ခေါ၊ ဘိက္ခဝေ၊ အဘိဇာနံ ပရိဇာနံ တတ္ထ စိတ္တံ ဝိရာဇယံ ပဇဟံ ဘဗ္ဗော ဒုက္ခက္ခယာယာ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘ယော သဗ္ဗံ သဗ္ဗတော ဉတွာ၊ သဗ္ဗတ္ထေသု န ရဇ္ဇတိ၊

သ ဝေ သဗ္ဗပရိညာ [သဗ္ဗံ ပရိညာ (သျာ. ပီ.)] သော၊ သဗ္ဗဒုက္ခမုပစ္စဂါ’’တိ [သဗ္ဗံ ဒုက္ခံ ဥပစ္စဂါတိ (သျာ.)၊ သဗ္ဗဒုက္ခံ ဥပစ္စဂါတိ (ပီ. အဋ္ဌ.)].

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. သတ္တမံ.