၈. မာနပရိညာသုတ္တံ

၈. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘မာနံ၊ ဘိက္ခဝေ၊ အနဘိဇာနံ အပရိဇာနံ တတ္ထ စိတ္တံ အဝိရာဇယံ အပ္ပဇဟံ အဘဗ္ဗော ဒုက္ခက္ခယာယ. မာနဉ္စ ခေါ၊ ဘိက္ခဝေ၊ အဘိဇာနံ ပရိဇာနံ တတ္ထ စိတ္တံ ဝိရာဇယံ ပဇဟံ ဘဗ္ဗော ဒုက္ခက္ခယာယာ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘မာနုပေတာ အယံ ပဇာ၊ မာနဂန္ထာ ဘဝေ ရတာ၊

မာနံ အပရိဇာနန္တာ၊ အာဂန္တာရော ပုနဗ္ဘဝံ.

‘‘ယေ စ မာနံ ပဟန္တွာန၊ ဝိမုတ္တာ မာနသင်္ခယေ၊

တေ မာနဂန္ထာဘိဘုနော၊ သဗ္ဗဒုက္ခမုပစ္စဂု’’န္တိ [သဗ္ဗဒုက္ခံ ဥပစ္စဂုန္တိ (ပီ.)၊ သဗ္ဗံ ဒုက္ခံ ဥပစ္စဂုန္တိ (အဋ္ဌကထာ)].

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. အဋ္ဌမံ.