၁၀. ဒေါသပရိညာသုတ္တံ

၁၀. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘ဒေါသံ၊ ဘိက္ခဝေ၊ အနဘိဇာနံ အပရိဇာနံ တတ္ထ စိတ္တံ အဝိရာဇယံ အပ္ပဇဟံ အဘဗ္ဗော ဒုက္ခက္ခယာယ. ဒေါသဉ္စ ခေါ၊ ဘိက္ခဝေ၊ အဘိဇာနံ ပရိဇာနံ တတ္ထ စိတ္တံ ဝိရာဇယံ ပဇဟံ ဘဗ္ဗော ဒုက္ခက္ခယာယာ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘ယေန ဒေါသေန ဒုဋ္ဌာသေ၊ သတ္တာ ဂစ္ဆန္တိ ဒုဂ္ဂတိံ၊

တံ ဒေါသံ သမ္မဒညာယ၊ ပဇဟန္တိ ဝိပဿိနော၊

ပဟာယ န ပုနာယန္တိ၊ ဣမံ လောကံ ကုဒါစန’’န္တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. ဒသမံ.

ပဌမော ဝဂ္ဂေါ နိဋ္ဌိတော.

တဿုဒ္ဒါနံ –

ရာဂဒေါသာ အထ မောဟော၊ ကောဓမက္ခာ မာနံ သဗ္ဗံ၊

မာနတော ရာဂဒေါသာ ပုန ဒွေ၊ ပကာသိတာ ဝဂ္ဂမာဟု ပဌမန္တိ.