၁၅. မဟာလောမဟံသစရိယာ

၁၁၉. ‘‘သုသာနေ သေယျံ ကပ္ပေမိ၊ ဆဝဋ္ဌိကံ ဥပနိဓာယဟံ၊

ဂါမဏ္ဍလာ [ဂေါမဏ္ဍလာ (သီ.)၊ ဂါမမဏ္ဍလာ (သျာ.)] ဥပါဂန္တွာ၊ ရူပံ ဒဿေန္တိနပ္ပကံ.

၁၂၀. ‘‘အပရေ ဂန္ဓမာလဉ္စ၊ ဘောဇနံ ဝိဝိဓံ ဗဟုံ၊

ဥပါယနာနူပနေန္တိ၊ ဟဋ္ဌာ သံဝိဂ္ဂမာနသာ.

၁၂၁. ‘‘ယေ မေ ဒုက္ခံ ဥပဟရန္တိ၊ ယေ စ ဒေန္တိ သုခံ မမ၊

သဗ္ဗေသံ သမကော ဟောမိ၊ ဒယာ ကောပေါ န ဝိဇ္ဇတိ.

၁၂၂. ‘‘သုခဒုက္ခေ တုလာဘူတော၊ ယသေသု အယသေသု စ၊

သဗ္ဗတ္ထ သမကော ဟောမိ၊ ဧသာ မေ ဥပေက္ခာပါရမီ’’တိ.

မဟာလောမဟံသစရိယံ ပန္နရသမံ.

ယုဓဉ္ဇယဝဂ္ဂေါ တတိယော.