၁၄. ဧကရာဇစရိယာ

၁၁၄. ‘‘ပုနာပရံ ယဒါ ဟောမိ၊ ဧကရာဇာတိ ဝိဿုတော၊

ပရမံ သီလံ အဓိဋ္ဌာယ၊ ပသာသာမိ မဟာမဟိံ.

၁၁၅. ‘‘ဒသ ကုသလကမ္မပထေ၊ ဝတ္တာမိ အနဝသေသတော၊

စတူဟိ သင်္ဂဟဝတ္ထူဟိ၊ သင်္ဂဏှာမိ [သင်္ဂဟာမိ (က.)] မဟာဇနံ.

၁၁၆. ‘‘ဧဝံ မေ အပ္ပမတ္တဿ၊ ဣဓ လောကေ ပရတ္ထ စ၊

ဒဗ္ဗသေနော ဥပဂန္တွာ၊ အစ္ဆိန္ဒန္တော ပုရံ မမ.

၁၁၇. ‘‘ရာဇူပဇီဝေ နိဂမေ၊ သဗလဋ္ဌေ သရဋ္ဌကေ၊

သဗ္ဗံ ဟတ္ထဂတံ ကတွာ၊ ကာသုယာ နိခဏီ မမံ.

၁၁၈. ‘‘အမစ္စမဏ္ဍလံ ရဇ္ဇံ၊ ဖီတံ အန္တေပုရံ မမ၊

အစ္ဆိန္ဒိတွာန ဂဟိတံ၊ ပိယံ ပုတ္တံဝ ပဿဟံ၊

မေတ္တာယ မေ သမော နတ္ထိ၊ ဧသာ မေ မေတ္တာပါရမီ’’တိ.

ဧကရာဇစရိယံ စုဒ္ဒသမံ.