၇. မာတင်္ဂစရိယာ

၆၀. ‘‘ပုနာပရံ ယဒါ ဟောမိ၊ ဇဋိလော ဥဂ္ဂတာပနော၊

မာတင်္ဂေါ နာမ နာမေန၊ သီလဝါ သုသမာဟိတော.

၆၁. ‘‘အဟဉ္စ ဗြာဟ္မဏော ဧကော၊ ဂင်္ဂါကူလေ ဝသာမုဘော၊

အဟံ ဝသာမိ ဥပရိ၊ ဟေဋ္ဌာ ဝသတိ ဗြာဟ္မဏော.

၆၂. ‘‘ဝိစရန္တော အနုကူလမှိ၊ ဥဒ္ဓံ မေ အဿမဒ္ဒသ၊

တတ္ထ မံ ပရိဘာသေတွာ၊ အဘိသပိ မုဒ္ဓဖာလနံ.

၆၃. ‘‘ယဒိဟံ တဿ ပကုပ္ပေယျံ၊ ယဒိ သီလံ န ဂေါပယေ၊

ဩလောကေတွာနဟံ တဿ၊ ကရေယျံ ဆာရိကံ ဝိယ.

၆၄. ‘‘ယံ သော တဒါ မံ အဘိသပိ၊ ကုပိတော ဒုဋ္ဌမာနသော၊

တဿေဝ မတ္ထကေ နိပတိ၊ ယောဂေန တံ ပမောစယိံ.

၆၅. ‘‘အနုရက္ခိံ မမ သီလံ၊ နာရက္ခိံ မမ ဇီဝိတံ၊

သီလဝါ ဟိ တဒါ အာသိံ၊ ဗောဓိယာယေဝ ကာရဏာ’’တိ.

မာတင်္ဂစရိယံ သတ္တမံ.