၁၀. သင်္ခပါလစရိယာ

၈၅. ‘‘ပုနာပရံ ယဒါ ဟောမိ၊ သင်္ခပါလော မဟိဒ္ဓိကော၊

ဒါဌာဝုဓော ဃောရဝိသော၊ ဒွိဇိဝှေါ ဥရဂါဓိဘူ.

၈၆. ‘‘စတုပ္ပထေ မဟာမဂ္ဂေ၊ နာနာဇနသမာကုလေ၊

စတုရော အင်္ဂေ အဓိဋ္ဌာယ၊ တတ္ထ ဝါသမကပ္ပယိံ.

၈၇. ‘‘ဆဝိယာ စမ္မေန မံသေန၊ နဟာရုအဋ္ဌိကေဟိ ဝါ၊

ယဿ ဧတေန ကရဏီယံ၊ ဒိန္နံယေဝ ဟရာတု သော.

၈၈. ‘‘အဒ္ဒသံသု ဘောဇပုတ္တာ၊ ခရာ လုဒ္ဒါ အကာရုဏာ၊

ဥပဂဉ္ဆုံ မမံ တတ္ထ၊ ဒဏ္ဍမုဂ္ဂရပါဏိနော.

၈၉. ‘‘နာသာယ ဝိနိဝိဇ္ဈိတွာ၊ နင်္ဂုဋ္ဌေ ပိဋ္ဌိကဏ္ဋကေ၊

ကာဇေ အာရောပယိတွာန၊ ဘောဇပုတ္တာ ဟရိံသု မံ.

၉၀. ‘‘သသာဂရန္တံ ပထဝိံ၊ သကာနနံ သပဗ္ဗတံ၊

ဣစ္ဆမာနော စဟံ တတ္ထ၊ နာသာဝါတေန ဈာပယေ.

၉၁. ‘‘သူလေဟိ ဝိနိဝိဇ္ဈန္တေ၊ ကောဋ္ဋယန္တေပိ သတ္တိဘိ၊

ဘောဇပုတ္တေ န ကုပ္ပါမိ၊ ဧသာ မေ သီလပါရမီ’’တိ.

သင်္ခပါလစရိယံ ဒသမံ.

ဟတ္ထိနာဂဝဂ္ဂေါ ဒုတိယော.

တဿုဒ္ဒါနံ –

ဟတ္ထိနာဂေါ ဘူရိဒတ္တော၊ စမ္ပေယျော ဗောဓိ မဟိံသော၊

ရုရု မာတင်္ဂေါ ဓမ္မော စ၊ အတြဇော စ ဇယဒ္ဒိသော.

ဧတေ နဝ သီလဗလာ၊ ပရိက္ခာရာ ပဒေသိကာ၊

ဇီဝိတံ ပရိရက္ခိတွာ၊ သီလာနိ အနုရက္ခိသံ.

သင်္ခပါလဿ မေ သတော၊ သဗ္ဗကာလမ္ပိ ဇီဝိတံ၊

ယဿ ကဿစိ နိယျတ္တံ၊ တသ္မာ သာ သီလပါရမီတိ.

သီလပါရမိနိဒ္ဒေသော နိဋ္ဌိတော.