၁. မာတုပေါသကစရိယာ

၁. ‘‘ယဒါ အဟောသိံ ပဝနေ၊ ကုဉ္ဇရော မာတုပေါသကော၊

န တဒါ အတ္ထိ မဟိယာ၊ ဂုဏေန မမ သာဒိသော.

၂. ‘‘ပဝနေ ဒိသွာ ဝနစရော၊ ရညော မံ ပဋိဝေဒယိ၊

‘တဝါနုစ္ဆဝေါ မဟာရာဇ၊ ဂဇော ဝသတိ ကာနနေ.

၃. ‘‘‘န တဿ ပရိက္ခာယတ္ထော၊ နပိ အာဠကကာသုယာ၊

သဟ ဂဟိတေ [သမံ ဂဟိတေ (သီ.)] သောဏ္ဍာယ၊ သယမေဝ ဣဓေဟိ’တိ.

၄. ‘‘တဿ တံ ဝစနံ သုတွာ၊ ရာဇာပိ တုဋ္ဌမာနသော၊

ပေသေသိ ဟတ္ထိဒမကံ၊ ဆေကာစရိယံ သုသိက္ခိတံ.

၅. ‘‘ဂန္တွာ သော ဟတ္ထိဒမကော၊ အဒ္ဒသ ပဒုမဿရေ၊

ဘိသမုဠာလံ [ဘိသမူလံ (က.)] ဥဒ္ဓရန္တံ၊ ယာပနတ္ထာယ မာတုယာ.

၆. ‘‘ဝိညာယ မေ သီလဂုဏံ၊ လက္ခဏံ ဥပဓာရယိ၊

‘ဧဟိ ပုတ္တာ’တိ ပတွာန၊ မမ သောဏ္ဍာယ အဂ္ဂဟိ.

၇. ‘‘ယံ မေ တဒါ ပါကတိကံ၊ သရီရာနုဂတံ ဗလံ၊

အဇ္ဇ နာဂသဟဿာနံ၊ ဗလေန သမသာဒိသံ.

၈. ‘‘ယဒိဟံ တေသံ ပကုပ္ပေယျံ၊ ဥပေတာနံ ဂဟဏာယ မံ၊

ပဋိဗလော ဘဝေ တေသံ၊ ယာဝ ရဇ္ဇမ္ပိ မာနုသံ.

၉. ‘‘အပိ စာဟံ သီလရက္ခာယ၊ သီလပါရမိပူရိယာ၊

န ကရောမိ စိတ္တေ အညထတ္တံ၊ ပက္ခိပန္တံ မမာဠကေ.

၁၀. ‘‘ယဒိ တေ မံ တတ္ထ ကောဋ္ဋေယျုံ၊ ဖရသူဟိ တောမရေဟိ စ၊

နေဝ တေသံ ပကုပ္ပေယျံ၊ သီလခဏ္ဍဘယာ မမာ’’တိ.

မာတုပေါသကစရိယံ ပဌမံ.