၆. နိမိရာဇစရိယာ

၄၀. ‘‘ပုနာပရံ ယဒါ ဟောမိ၊ မိထိလာယံ ပုရုတ္တမေ၊

နိမိ နာမ မဟာရာဇာ၊ ပဏ္ဍိတော ကုသလတ္ထိကော.

၄၁. ‘‘တဒါဟံ မာပယိတွာန၊ စတုဿာလံ စတုမ္မုခံ၊

တတ္ထ ဒါနံ ပဝတ္တေသိံ၊ မိဂပက္ခိနရာဒိနံ.

၄၂. ‘‘အစ္ဆာဒနဉ္စ သယနံ၊ အန္နံ ပါနဉ္စ ဘောဇနံ၊

အဗ္ဗောစ္ဆိန္နံ ကရိတွာန၊ မဟာဒါနံ ပဝတ္တယိံ.

၄၃. ‘‘ယထာပိ သေဝကော သာမိံ၊ ဓနဟေတုမုပါဂတော၊

ကာယေန ဝါစာ မနသာ၊ အာရာဓနီယမေသတိ.

၄၄. ‘‘တထေဝါဟံ သဗ္ဗဘဝေ၊ ပရိယေသိဿာမိ ဗောဓိဇံ၊

ဒါနေန သတ္တေ တပ္ပေတွာ၊ ဣစ္ဆာမိ ဗောဓိမုတ္တမ’’န္တိ.

နိမိရာဇစရိယံ ဆဋ္ဌံ.