၇. စန္ဒကုမာရစရိယာ

၄၅. ‘‘ပုနာပရံ ယဒါ ဟောမိ၊ ဧကရာဇဿ အတြဇော၊

နဂရေ ပုပ္ဖဝတိယာ၊ ကုမာရော စန္ဒသဝှယော.

၄၆. ‘‘တဒါဟံ ယဇနာ မုတ္တော၊ နိက္ခန္တော ယညဝါဋတော၊

သံဝေဂံ ဇနယိတွာန၊ မဟာဒါနံ ပဝတ္တယိံ.

၄၇. ‘‘နာဟံ ပိဝါမိ ခါဒါမိ၊ နပိ ဘုဉ္ဇာမိ ဘောဇနံ၊

ဒက္ခိဏေယျေ အဒတွာန၊ အပိ ဆပ္ပဉ္စရတ္တိယော.

၄၈. ‘‘ယထာပိ ဝါဏိဇော နာမ၊ ကတွာန ဘဏ္ဍသဉ္စယံ၊

ယတ္ထ လာဘော မဟာ ဟောတိ၊ တတ္ထ တံ [တတ္ထ နံ (သီ.)၊ တတ္ထ (က.)] ဟရတိ ဘဏ္ဍကံ.

၄၉. ‘‘တထေဝ သကဘုတ္တာပိ၊ ပရေ ဒိန္နံ မဟပ္ဖလံ၊

တသ္မာ ပရဿ ဒါတဗ္ဗံ၊ သတဘာဂေါ ဘဝိဿတိ.

၅၀. ‘‘ဧတမတ္ထဝသံ ဉတွာ၊ ဒေမိ ဒါနံ ဘဝါဘဝေ၊

န ပဋိက္ကမာမိ ဒါနတော၊ သမ္ဗောဓိမနုပတ္တိယာ’’တိ.

စန္ဒကုမာရစရိယံ သတ္တမံ.