၉. ဗောဓိသိဉ္စကတ္ထေရအပဒါနံ
၄၆. ‘‘ဝိပဿိဿ ဘဂဝတော၊ မဟာဗောဓိမဟော အဟု၊
ပဗ္ဗဇ္ဇုပဂတော သန္တော၊ ဥပဂစ္ဆိံ အဟံ တဒါ.
၄၇. ‘‘ကုသုမောဒကမာဒါယ၊ ဗောဓိယာ ဩကိရိံ အဟံ၊
မောစယိဿတိ နော မုတ္တော၊ နိဗ္ဗာပေဿတိ နိဗ္ဗုတော.
၄၈. ‘‘ဧကနဝုတိတော ကပ္ပေ၊ ယံ ဗောဓိမဘိသိဉ္စယိံ၊
ဒုဂ္ဂတိံ နာဘိဇာနာမိ၊ ဗောဓိသိဉ္စာယိဒံ ဖလံ.
၄၉. ‘‘တေတ္တိံသေ ဝတ္တမာနမှိ၊ ကပ္ပေ အာသုံ ဇနာဓိပါ၊
ဥဒကသေစနာ နာမ၊ အဋ္ဌေတေ စက္ကဝတ္တိနော.
၅၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.
ဣတ္ထံ သုဒံ အာယသ္မာ ဗောဓိသိဉ္စကော ထေရော ဣမာ ဂါထာယော အဘာသိတ္ထာတိ.
ဗောဓိသိဉ္စကတ္ထေရဿာပဒါနံ နဝမံ.