၁၀. ပဒုမပုပ္ဖိယတ္ထေရအပဒါနံ

၅၁. ‘‘ပေါက္ခရဝနံ ပဝိဋ္ဌော၊ ဘဉ္ဇန္တော ပဒုမာနိဟံ၊

တတ္ထဒ္ဒသံ ဖုဿံ ဗုဒ္ဓံ [အဒ္ဒသံ ဖုဿသမ္ဗုဒ္ဓံ (သီ. သျာ.)]၊ ဗာတ္တိံသဝရလက္ခဏံ.

၅၂. ‘‘ပဒုမပုပ္ဖံ ဂဟေတွာန၊ အာကာသေ ဥက္ခိပိံ အဟံ၊

ပါပကမ္မံ သရိတွာန၊ ပဗ္ဗဇိံ အနဂါရိယံ.

၅၃. ‘‘ပဗ္ဗဇိတွာန ကာယေန၊ မနသာ သံဝုတေန စ၊

ဝစီဒုစ္စရိတံ ဟိတွာ၊ အာဇီဝံ ပရိသောဓယိံ.

၅၄. ‘‘ဒွေနဝုတေ ဣတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၅၅. ‘‘ပဒုမာဘာသနာမာ စ၊ အဋ္ဌာရသ မဟီပတီ၊

အဋ္ဌာရသေသု ကပ္ပေသု၊ အဋ္ဌတာလီသမာသိသုံ.

၅၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပဒုမပုပ္ဖိယော ထေရော ဣမာ ဂါထာယော အဘာသိတ္ထာတိ၊

ပဒုမပုပ္ဖိယတ္ထေရဿာပဒါနံ ဒသမံ.

တိမိရဝဂ္ဂေါ နဝမော.