၆. ဒုတိယရံသိသညကတ္ထေရအပဒါနံ

၃၅. ‘‘ပဗ္ဗတေ ဟိမဝန္တမှိ၊ ဝါကစီရဓရော အဟံ၊

စင်္ကမဉ္စ သမာရူဠှော၊ နိသီဒိံ ပါစိနာမုခေါ.

၃၆. ‘‘ပဗ္ဗတေ သုဂတံ ဒိသွာ၊ ဖုဿံ ဈာနရတံ တဒါ၊

အဉ္ဇလိံ ပဂ္ဂဟေတွာန၊ ရံသျာ စိတ္တံ ပသာဒယိံ.

၃၇. ‘‘ဒွေနဝုတေ ဣတော ကပ္ပေ၊ ယံ သညမလဘိံ တဒါ၊

ဒုဂ္ဂတိံ နာဘိဇာနာမိ၊ ရံသိသညာယိဒံ ဖလံ.

၃၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ရံသိသညကော ထေရော ဣမာ ဂါထာယော အဘာသိတ္ထာတိ.

ဒုတိယရံသိသညကတ္ထေရဿာပဒါနံ ဆဋ္ဌံ.