၇. ဖလဒါယကတ္ထေရအပဒါနံ

၃၉. ‘‘ပဗ္ဗတေ ဟိမဝန္တမှိ၊ ခရာဇိနဓရော အဟံ၊

ဖုဿံ ဇိနဝရံ ဒိသွာ၊ ဖလဟတ္ထော ဖလံ အဒံ.

၄၀. ‘‘ယမဟံ ဖလမဒါသိံ၊ ဝိပ္ပသန္နေန စေတသာ၊

ဘဝေ နိဗ္ဗတ္တမာနမှိ၊ ဖလံ နိဗ္ဗတ္တတေ မမ.

၄၁. ‘‘ဒွေနဝုတေ ဣတော ကပ္ပေ၊ ယံ ဖလံ အဒဒိံ အဟံ၊

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ.

၄၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဖလဒါယကော ထေရော ဣမာ ဂါထာယော အဘာသိတ္ထာတိ.

ဖလဒါယကတ္ထေရဿာပဒါနံ သတ္တမံ.