၇. သူစိဒါယကတ္ထေရအပဒါနံ
၃၀. ‘‘တိံသကပ္ပသဟဿမှိ၊ သမ္ဗုဒ္ဓေါ လောကနာယကော၊
သုမေဓော နာမ နာမေန၊ ဗာတ္တိံသဝရလက္ခဏော.
၃၁. ‘‘တဿ ကဉ္စနဝဏ္ဏဿ၊ ဒွိပဒိန္ဒဿ တာဒိနော၊
ပဉ္စ သူစီ မယာ ဒိန္နာ၊ သိဗ္ဗနတ္ထာယ စီဝရံ.
၃၂. ‘‘တေနေဝ သူစိဒါနေန၊ နိပုဏတ္ထဝိပဿကံ၊
တိက္ခံ လဟုဉ္စ ဖာသုဉ္စ၊ ဉာဏံ မေ ဥဒပဇ္ဇထ.
၃၃. ‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊
ဓာရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ.
၃၄. ‘‘ဒွိပဒါဓိပတီ နာမ၊ ရာဇာနော စတုရော အဟုံ၊
သတ္တရတနသမ္ပန္နာ၊ စက္ကဝတ္တီ မဟဗ္ဗလာ.
၃၅. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.
ဣတ္ထံ သုဒံ အာယသ္မာ သူစိဒါယကော ထေရော ဣမာ ဂါထာယော အဘာသိတ္ထာတိ.
သူစိဒါယကတ္ထေရဿာပဒါနံ သတ္တမံ.