၆. တိဏသန္ထရဒါယကတ္ထေရအပဒါနံ

၂၂. ‘‘ဟိမဝန္တဿာဝိဒူရေ၊ မဟာဇာတဿရော အဟု၊

သတပတ္တေဟိ သဉ္ဆန္နော၊ နာနာသကုဏမာလယော.

၂၃. ‘‘တမှိ နှတွာ စ ပိတွာ [ပီတွာ (သီ. သျာ.)] စ၊ အဝိဒူရေ ဝသာမဟံ၊

အဒ္ဒသံ သမဏာနဂ္ဂံ၊ ဂစ္ဆန္တံ အနိလဉ္ဇသေ.

၂၄. ‘‘မမ သင်္ကပ္ပမညာယ၊ သတ္ထာ လောကေ အနုတ္တရော၊

အဗ္ဘတော ဩရုဟိတွာန၊ ဘူမိယံဌာသိ တာဝဒေ.

၂၅. ‘‘ဝိသာဏေန [လာယနေန (သျာ.)] တိဏံ ဂယှ၊ နိသီဒနမဒါသဟံ၊

နိသီဒိ ဘဂဝါ တတ္ထ၊ တိဿော လောကဂ္ဂနာယကော.

၂၆. ‘‘သကံ စိတ္တံ ပသာဒေတွာ၊ အဝန္ဒိ လောကနာယကံ၊

ပဋိကုဋိကော [ဥက္ကုဋိကော (သျာ. က.)] အပသက္ကိံ၊ နိဇ္ဈာယန္တော မဟာမုနိံ.

၂၇. ‘‘တေန စိတ္တပ္ပသာဒေန၊ နိမ္မာနံ ဥပပဇ္ဇဟံ၊

ဒုဂ္ဂတိံ နာဘိဇာနာမိ၊ သန္ထရဿ ဣဒံ ဖလံ.

၂၈. ‘‘ဣတော ဒုတိယကေ ကပ္ပေ၊ မိဂ [မိတ္တ (သျာ.)] သမ္မတခတ္တိယော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၂၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ တိဏသန္ထရဒါယကော ထေရော ဣမာ ဂါထာယော အဘာသိတ္ထာတိ.

တိဏသန္ထရဒါယကတ္ထေရဿာပဒါနံ ဆဋ္ဌံ.