၁. နာဂသမာလတ္ထေရအပဒါနံ

၁. ‘‘အပါဋလိံ အဟံ ပုပ္ဖံ၊ ဥဇ္ဈိတံ သုမဟာပထေ၊

ထူပမှိ အဘိရောပေသိံ၊ သိခိနော လောကဗန္ဓုနော.

၂. ‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ ထူပပူဇာယိဒံ ဖလံ.

၃. ‘‘ဣတော ပန္နရသေ ကပ္ပေ၊ ဘူမိယော [ပုပ္ဖိယော (သျာ.)] နာမ ခတ္တိယော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၄. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ နာဂသမာလော ထေရော ဣမာ ဂါထာယော အဘာသိတ္ထာတိ.

နာဂသမာလတ္ထေရဿာပဒါနံ ပဌမံ.