၇. ပဉ္စဒီပကတ္ထေရအပဒါနံ

၅၀. ‘‘ပဒုမုတ္တရဗုဒ္ဓဿ၊ သဗ္ဗဘူတာနုကမ္ပိနော၊

သဒ္ဒဟိတွာန [သုသဏ္ဌဟိတွာ (သီ.)] သဒ္ဓမ္မေ၊ ဥဇုဒိဋ္ဌိ အဟောသဟံ.

၅၁. ‘‘ပဒီပဒါနံ ပါဒါသိံ၊ ပရိဝါရေတွာန ဗောဓိယံ၊

သဒ္ဒဟန္တော ပဒီပါနိ၊ အကရိံ တာဝဒေ အဟံ.

၅၂. ‘‘ယံ ယံ ယောနုပပဇ္ဇာမိ၊ ဒေဝတ္တံ အထ မာနုသံ၊

အာကာသေ ဥက္ကံ ဓာရေန္တိ၊ ဒီပဒါနဿိဒံ ဖလံ.

၅၃. ‘‘တိရောကုဋ္ဋံ တိရောသေလံ၊ သမတိဂ္ဂယှ ပဗ္ဗတံ၊

သမန္တာ ယောဇနသတံ၊ ဒဿနံ အနုဘောမဟံ.

၅၄. ‘‘တေန ကမ္မာဝသေသေန၊ ပတ္တောမှိ အာသဝက္ခယံ၊

ဓာရေမိ အန္တိမံ ဒေဟံ၊ ဒွိပဒိန္ဒဿ သာသနေ.

၅၅. ‘‘စတုတ္တိံသေ ကပ္ပသတေ၊ သတစက္ခုသနာမကာ၊

ရာဇာဟေသုံ မဟာတေဇာ၊ စက္ကဝတ္တီ မဟဗ္ဗလာ.

၅၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပဉ္စဒီပကော ထေရော ဣမာ ဂါထာယော အဘာသိတ္ထာတိ.

ပဉ္စဒီပကတ္ထေရဿာပဒါနံ သတ္တမံ.