၈. ဓဇဒါယကတ္ထေရအပဒါနံ

၅၇. ‘‘ပဒုမုတ္တရဗုဒ္ဓဿ၊ ဗောဓိယာ ပါဒပုတ္တမေ၊

ဟဋ္ဌော ဟဋ္ဌေန စိတ္တေန၊ ဓဇမာရောပယိံ အဟံ.

၅၈. ‘‘ပတိတပတ္တာနိ ဂဏှိတွာ၊ ဗဟိဒ္ဓါ ဆဍ္ဍယိံ အဟံ၊

အန္တောသုဒ္ဓံ ဗဟိသုဒ္ဓံ၊ အဓိမုတ္တမနာသဝံ.

၅၉. ‘‘သမ္မုခါ ဝိယ သမ္ဗုဒ္ဓံ၊ အဝန္ဒိံ ဗောဓိမုတ္တမံ၊

ပဒုမုတ္တရော လောကဝိဒူ၊ အာဟုတီနံ ပဋိဂ္ဂဟော.

၆၀. ‘‘ဘိက္ခုသံဃေ ဌိတော သတ္ထာ၊ ဣမာ ဂါထာ အဘာသထ၊

‘‘‘ဣမိနာ ဓဇဒါနေန၊ ဥပဋ္ဌာနေန စူဘယံ.

၆၁. ‘‘‘ကပ္ပါနံ သတသဟဿံ၊ ဒုဂ္ဂတိံ သော န ဂစ္ဆတိ၊

ဒေဝေသု ဒေဝသောဘဂျံ၊ အနုဘောဿတိနပ္ပကံ.

၆၂. ‘‘‘အနေကသတက္ခတ္တုဉ္စ၊ ရာဇာ ရဋ္ဌေ ဘဝိဿတိ၊

ဥဂ္ဂတော နာမ နာမေန၊ စက္ကဝတ္တီ ဘဝိဿတိ.

၆၃. ‘‘‘သမ္ပတ္တိံ အနုဘောတွာန၊ သုက္ကမူလေန စောဒိတော၊

ဂေါတမဿ ဘဂဝတော၊ သာသနေဘိရမိဿတိ’.

၆၄. ‘‘ပဓာနပဟိတတ္တောမှိ၊ ဥပသန္တော နိရူပဓိ၊

ဓာရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ.

၆၅. ‘‘ဧကပညာသသဟဿေ၊ ကပ္ပေ ဥဂ္ဂတသဝှယော [သဝှယာ (သျာ.)]၊

ပညာသသတသဟဿေ၊ ခတ္တိယော မေဃသဝှယော [ခတ္တိယာ ခေမသဝှယာ (သျာ.)].

၆၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဓဇဒါယကော ထေရော ဣမာ ဂါထာယော အဘာသိတ္ထာတိ.

ဓဇဒါယကတ္ထေရဿာပဒါနံ အဋ္ဌမံ.