၃. ဂယာကဿပတ္ထေရအပဒါနံ

၃၅. ‘‘အဇိနစမ္မဝတ္ထောဟံ [အဇိနဝတ္တံ နိဝတ္တောဟံ (သီ.)]၊ ခါရိဘာရဓရော တဒါ၊

ခါရိကံ ဟာရယိတွာန၊ ကောလံ အဟာသိ အဿမံ.

၃၆. ‘‘ဘဂဝါ တမှိ သမယေ၊ ဧကော အဒုတိယော ဇိနော၊

မမဿမံ ဥပါဂစ္ဆိ၊ ဇောတေန္တော သဗ္ဗကာလိကံ.

၃၇. ‘‘သကံ စိတ္တံ ပသာဒေတွာ၊ အဘိဝါဒေတွာန သုဗ္ဗတံ၊

ဥဘော ဟတ္ထေဟိ ပဂ္ဂယှ၊ ကောလံ ဗုဒ္ဓဿဒါသဟံ.

၃၈. ‘‘ဧကတိံသေ ဣတော ကပ္ပေ၊ ယံ ဖလံ အဒဒိံ တဒါ၊

ဒုဂ္ဂတိံ နာဘိဇာနာမိ၊ ကောလဒါနဿိဒံ ဖလံ.

၃၉. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၄၀. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၄၁. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဂယာကဿပေါ ထေရော ဣမာ ဂါထာယော

အဘာသိတ္ထာတိ.

ဂယာကဿပတ္ထေရဿာပဒါနံ တတိယံ.