၄. ကိမိလတ္ထေရအပဒါနံ

၄၂. ‘‘နိဗ္ဗုတေ ကကုသန္ဓမှိ၊ ဗြာဟ္မဏမှိ ဝုသီမတိ၊

ဂဟေတွာ သလလံ မာလံ၊ မဏ္ဍပံ ကာရယိံ အဟံ.

၄၃. ‘‘တာဝတိံသံ ဂတော သန္တော၊ လဘိမှ [လဘာမိ (က.)] ဗျမှမုတ္တမံ၊

အညေ ဒေဝေတိရောစာမိ၊ ပုညကမ္မဿိဒံ ဖလံ.

၄၄. ‘‘ဒိဝါ ဝါ ယဒိ ဝါ ရတ္တိံ၊ စင်္ကမန္တော ဌိတော စဟံ၊

ဆန္နော သလလပုပ္ဖေဟိ၊ ပုညကမ္မဿိဒံ ဖလံ.

၄၅. ‘‘ဣမသ္မိံယေဝ ကပ္ပမှိ၊ ယံ ဗုဒ္ဓမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၄၆. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၄၇. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၄၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကိမိလော [ကိမ္ဗိလော (သီ.)] ထေရော ဣမာ ဂါထာယော

အဘာသိတ္ထာတိ.

ကိမိလတ္ထေရဿာပဒါနံ စတုတ္ထံ.