၈. လောမသကင်္ဂိယတ္ထေရအပဒါနံ

၂၂၅. ‘‘ဣမမှိ ဘဒ္ဒကေ ကပ္ပေ၊ ဗြဟ္မဗန္ဓု မဟာယသော၊

ကဿပေါ နာမ ဂေါတ္တေန၊ ဥပ္ပဇ္ဇိ ဝဒတံ ဝရော.

၂၂၆. ‘‘တဒါဟံ စန္ဒနော စေဝ၊ ပဗ္ဗဇိတွာန သာသနေ၊

အာပါဏကောဋိကံ ဓမ္မံ၊ ပူရယိတွာန သာသနေ.

၂၂၇. ‘‘တတော စုတာ သန္တုသိတံ၊ ဥပပန္နာ ဥဘော မယံ၊

တတ္ထ ဒိဗ္ဗေဟိ နစ္စေဟိ၊ ဂီတေဟိ ဝါဒိတေဟိ စ.

၂၂၈. ‘‘ရူပါဒိဒသဟင်္ဂေဟိ၊ အဘိဘောတွာန သေသကေ၊

ယာဝတာယုံ ဝသိတွာန၊ အနုဘောတွာ မဟာသုခံ.

၂၂၉. ‘‘တတော စဝိတွာ တိဒသံ၊ စန္ဒနော ဥပပဇ္ဇထ၊

အဟံ ကပိလဝတ္ထုသ္မိံ၊ အဇာယိံ သာကိယတြဇော.

၂၃၀. ‘‘ယဒါ ဥဒါယိတ္ထေရေန၊ အဇ္ဈိဋ္ဌော လောကနာယကော၊

အနုကမ္ပိယ သကျာနံ၊ ဥပေသိ ကပိလဝှယံ.

၂၃၁. ‘‘တဒါတိမာနိနော သကျာ၊ န ဗုဒ္ဓဿ ဂုဏညုနော၊

ပဏမန္တိ န သမ္ဗုဒ္ဓံ၊ ဇာတိထဒ္ဓါ အနာဒရာ.

၂၃၂. ‘‘တေသံ သင်္ကပ္ပမညာယ၊ အာကာသေ စင်္ကမီ ဇိနော၊

ပဇ္ဇုန္နော ဝိယ ဝဿိတ္ထ၊ ပဇ္ဇလိတ္ထ ယထာ သိခီ.

၂၃၃. ‘‘ဒဿေတွာ ရူပမတုလံ၊ ပုန အန္တရဓာယထ၊

ဧကောပိ ဟုတွာ ဗဟုဓာ၊ အဟောသိ ပုနရေကကော.

၂၃၄. ‘‘အန္ဓကာရံ ပကာသဉ္စ၊ ဒဿယိတွာ အနေကဓာ၊

ပါဋိဟေရံ ကရိတွာန၊ ဝိနယီ ဉာတကေ မုနိ.

၂၃၅. ‘‘စာတုဒ္ဒီပေါ မဟာမေဃော၊ တာဝဒေဝ ပဝဿထ၊

တဒါ ဟိ ဇာတကံ ဗုဒ္ဓေါ၊ ဝေဿန္တရမဒေသယိ.

၂၃၆. ‘‘တဒါ တေ ခတ္တိယာ သဗ္ဗေ၊ နိဟန္တွာ ဇာတိဇံ မဒံ၊

ဥပေသုံ သရဏံ ဗုဒ္ဓံ၊ အာဟ သုဒ္ဓေါဒနော တဒါ.

၂၃၇. ‘‘‘ဣဒံ တတိယံ တဝ ဘူရိပည၊ ပါဒါနိ ဝန္ဒာမိ သမန္တစက္ခု၊

ယဒါဘိဇာတော ပထဝီ ပကမ္ပယီ၊ ယဒါ စ တံ နဇ္ဇဟိ ဇမ္ဗုဆာယာ’.

၂၃၈. ‘‘တဒါ ဗုဒ္ဓါနုဘာဝံ တံ၊ ဒိသွာ ဝိမှိတမာနသော၊

ပဗ္ဗဇိတွာန တတ္ထေဝ၊ နိဝသိံ မာတုပူဇကော.

၂၃၉. ‘‘စန္ဒနော ဒေဝပုတ္တော မံ၊ ဥပဂန္တွာနုပုစ္ဆထ၊

ဘဒ္ဒေကရတ္တဿ တဒါ၊ သင်္ခေပဝိတ္ထာရံ နယံ.

၂၄၀. ‘‘စောဒိတောဟံ တဒါ တေန၊ ဥပေစ္စ နရနာယကံ၊

ဘဒ္ဒေကရတ္တံ သုတွာန၊ သံဝိဂ္ဂေါ ဝနမာမကော.

၂၄၁. ‘‘တဒါ မာတရမပုစ္ဆိံ၊ ဝနေ ဝစ္ဆာမိ ဧကကော၊

သုခုမာလောတိ မေ မာတာ၊ ဝါရယီ တံ [တေ (သျာ. ပီ. က.)] တဒါ ဝစံ.

၂၄၂. ‘‘ကာသံ [ဒဗ္ဗံ (သီ. သျာ. ပီ.)] ကုသံ ပေါဋကိလံ၊ ဥသီရံ မုဉ္ဇပဗ္ဗဇံ [မုဉ္ဇဗဗ္ဗဇံ (သီ. ပီ.)]၊

ဥရသာ ပနုဒိဿာမိ၊ ဝိဝေကမနုဗြူဟယံ.

၂၄၃. ‘‘တဒါ ဝနံ ပဝိဋ္ဌောဟံ၊ သရိတွာ ဇိနသာသနံ၊

ဘဒ္ဒေကရတ္တဩဝါဒံ၊ အရဟတ္တမပါပုဏိံ.

၂၄၄. ‘‘‘အတီတံ နာနွာဂမေယျ၊ နပ္ပဋိကင်္ခေ အနာဂတံ၊

ယဒတီတံ ပဟီနံ တံ၊ အပ္ပတ္တဉ္စ အနာဂတံ.

၂၄၅. ‘‘‘ပစ္စုပ္ပန္နဉ္စ ယော ဓမ္မံ၊ တတ္ထ တတ္ထ ဝိပဿတိ၊

အသံဟီရံ အသံကုပ္ပံ၊ တံ ဝိဒွါ မနုဗြူဟယေ.

၂၄၆. ‘‘‘အဇ္ဇေဝ ကိစ္စမာတပ္ပံ၊ ကော ဇညာ မရဏံ သုဝေ၊

န ဟိ နော သင်္ဂရံ [သင်္ကရံ (က.)] တေန၊ မဟာသေနေန မစ္စုနာ.

၂၄၇. ‘‘‘ဧဝံဝိဟာရိံ အာတာပိံ၊ အဟောရတ္တမတန္ဒိတံ၊

တံ ဝေ ဘဒ္ဒေကရတ္တောတိ၊ သန္တော အာစိက္ခတေ မုနိ’.

၂၄၈. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၂၄၉. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၂၅၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ လောမသကင်္ဂိယော [လောမသင်္ခိယော (သျာ. က.)] ထေရော ဣမာ ဂါထာယော

အဘာသိတ္ထာတိ.

လောမသကင်္ဂိယတ္ထေရဿာပဒါနံ အဋ္ဌမံ.