၅. ပဉ္စဟတ္ထိယတ္ထေရအပဒါနံ

၇၇. ‘‘သုမေဓော နာမ သမ္ဗုဒ္ဓေါ၊ ဂစ္ဆတေ အန္တရာပဏေ၊

ဩက္ခိတ္တစက္ခု [ခိတ္တစက္ခု (က. သီ. က.)] မိတဘာဏီ၊ သတိမာ သံဝုတိန္ဒြိယော.

၇၈. ‘‘ပဉ္စ ဥပ္ပလဟတ္ထာနိ၊ အာဝေဠတ္ထံ အဟံသု မေ၊

တေန ဗုဒ္ဓံ အပူဇေသိံ၊ ပသန္နော သေဟိ ပါဏိဘိ.

၇၉. ‘‘အာရောပိတာ စ တေ ပုပ္ဖါ၊ ဆဒနံ အဿု သတ္ထုနော၊

သမာဓိံသု [သံသာဝိံသု (သီ.)] မဟာနာဂံ၊ သိဿာ အာစရိယံ ယထာ.

၈၀. ‘‘တိံသကပ္ပသဟဿမှိ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၈၁. ‘‘ဣတော ဝီသကပ္ပသတေ၊ အဟေသုံ ပဉ္စ ခတ္တိယာ၊

ဟတ္ထိယာ နာမ နာမေန၊ စက္ကဝတ္တီ မဟဗ္ဗလာ.

၈၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပဉ္စဟတ္ထိယော ထေရော ဣမာ ဂါထာယော အဘာသိတ္ထာတိ.

ပဉ္စဟတ္ထိယတ္ထေရဿာပဒါနံ ပဉ္စမံ.