၆. ပဒုမစ္ဆဒနိယတ္ထေရအပဒါနံ

၈၃. ‘‘နိဗ္ဗုတေ လောကနာထမှိ၊ ဝိပဿိမှဂ္ဂပုဂ္ဂလေ၊

သုဖုလ္လပဒုမံ ဂယှ၊ စိတမာရောပယိံ အဟံ.

၈၄. ‘‘အာရောပိတေ စ စိတကေ၊ ဝေဟာသံ နဘမုဂ္ဂမိ၊

အာကာသေ ဆဒနံ [အာကာသစ္ဆဒနံ (သီ.)] ကတွာ၊ စိတကမှိ အဓာရယိ.

၈၅. ‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၈၆. ‘‘သတ္တတာလီသိတော ကပ္ပေ၊ ပဒုမိဿရနာမကော၊

စာတုရန္တော ဝိဇိတာဝီ၊ စက္ကဝတ္တီ မဟဗ္ဗလော.

၈၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပဒုမစ္ဆဒနိယော ထေရော ဣမာ ဂါထာယော အဘာသိတ္ထာတိ၊

ပဒုမစ္ဆဒနိယတ္ထေရဿာပဒါနံ ဆဋ္ဌံ.